Rais Samia atalihutubia bunge hilo la 13 kwa mara ya kwanza mara baada ya kupatikana kwa Waziri Mkuu, Spika wa Bunge na naibu wake, huku kukiwa na matarajio kadhaa yanayosubiriwa kwa hamu na wananchi ikiwemo kusikia suala la hali ya demokrasia na usalama nchini Tanzania ilivyo hivi sasa.
Wakizungumza na DW kuelekea hotuba ya Rais Samia Suluhu Hassan wananchi na wanasiasa mbalimbali wanasema, matarajio yao katika hotuba hiyo ni kusikia msimamo wa serikali hasa kuhusu maandamano yaliyosababisha vurugu wakati na baada ya uchaguzi mkuu wa Oktoba 29 mwaka huu, pamoja na mikakati ya kurejesha hali ya kawaida ya usalama kufuatia sintofahamu hiyo.
Wanasiasa: Tunasubiri kusikia maendeleo ya wananchi
Mbali na wananchi wa kawaida kueleza matarajio yao katika hotuba ya Rais Samia ya kulizindua bunge, nao wabunge mbalimbali waliozungumza na DW, wanasema kuwa wanatarajia kusikia kutoka kwa kiongozi huyo suala zima la ulinzi na usalama pamoja na huduma za kijamii katika kumletea maendeleo Mtanzania.
Tanzania iliingia katika maandamano yaliyosababisha vurugu na vifo wakati na baada ya uchaguzi mkuu mnamo Oktoba 29 mwaka huu na kuleta mgawanyiko miongoni mwa jamii.
Kwa msingi huo ni matarajio ya watu wengi kusikia kitakachozungumzwa na Rais Samia katika hotuba yake ya kwanza atakapokuwa akilizindua Bunge la 13 la Jamhuri ya Muungano wa Tanzania.