Haya yanafanyika wakati ambapo Urusi imezidisha mashambulizi yake ndani ya Ukraine huku Rais Volodymyr Zelenskiy akiwatembelea wanajeshi kusini mwa Zaporizhzhia ambako ni karibu na eneo la mapambano ya kivita.
Msemaji wa ikulu ya Kremlin, Dmitry Peskov amewaambia waandishi wa habari kuwa Urusi bado ina nia ya kupatikana kwa amani kwa kutumia njia za kidiplomasia na kisiasa vile vile.
“Urusi inataka amani na inataka kuusuluhisha mzozo huu wa Ukraine kwa njia za kidiplomasia na kisiasa ila pasipokuwa na fursa hiyo na utawala wa Kyiv ukifunga milango yake kwa mazungumzo, basi tutaendelea na operesheni ya kijeshi. Kipaumbele chetu ni kuhakikisha malengo yetu, usalama wa vizazi vijavyo na kutimiza majukumu yaliyoko mbele yetu,” alisema Peskov.
Lakini Ukraine inasema kuwa haiwezi kuyakubali masharti ya Urusi ya kuvisitisha vita hivyo kwani ni sawa na kuitaka ijisalimishe.
Urusi yaviteka vijiji viwili zaidi
Haya yanafanyika wakati ambapo Rais wa Ukraine Volodymyr Zelenskiy leo, Alhamis, amevitembelea vikosi vyake kusini mwa Zaporizhzhia ambako Urusi imeyateka maeneo kadhaa hivi majuzi.
Ziara yake hii inafanyika wakati ambapo Urusi inasema imeviteka vijiji viwili zaidi katika maeneo ya Kharkiv na Dnipropetrovsk huku Kyiv ikipambana kutouachia mji muhimu wa mashariki wa Pokrovsk.
Wakati huo huo, mamlaka zinasema takribani watu watatu wameuawa leo katika shambulizi la droni la Urusi karibu na kijiji cha Bohuslavka huko mashariki mwa Ukraine katika eneo la Kharkiv.
Kulingana na gavana Oleh Syniehubov, watu wawili wamekufa papo hapo na mmoja alikufa akiwa hospitali, na mwengine akijeruhiwa.
Huku Urusi ikiendeleza mashambulizi yake huko mashariki mwa Ukraine, Umoja wa Ulaya leo umetangaza msaada mwengine wa kifedha kwa Ukraine.
Kulingana na Rais wa Halmshauri Kuu ya Umoja wa Ulaya Ursula von der Leyen aliyekuwa akilihutubia Bunge la Ulaya, umoja huo utaipatia Ukraine dola bilioni 6.97 kama mkopo utakaolipwa na riba juu yake kutokana na rasilimali za Urusi zilizofungiwa ndani ya Umoja wa Ulaya.
Misaada zaidi kwa Ukraine
Mbali na Umoja wa Ulaya, muungano wa kijeshi wa mataifa 8 ya Nordic na Baltic umetangaza leo kuwa unapanga kuipa Ukraine, msaada wa pamoja wa zana za kijeshi kutoka Marekani, wenye gharama ya dola milioni 500. Mataifa hayo ni Denmark, Estonia, Finlad, Iceland, Lithuania, Norway na Sweden.
Katibu Mkuu wa Jumuiya ya Kujihami ya NATO, Mark Rutte ameipongeza hatua hiyo akisema itaisaidia Ukraine na silaha za kijeshi inazozihitaji mno kuelekea miezi ya msimu wa baridi.
Hayo yakiarifiwa Kansela wa Ujerumani Friedrich Merz Alhamis, amemwambia Rais wa Ukraine Volodymyr Zelenskiy kufanya juhudi zaidi apambane na ufisadi, baada ya sakata kubwa la ufisadi kuikumba serikali yake.
Akizungumza na Zelenskiy kwa njia ya simu Merz amesema serikali ya Ukraine inastahili kutumia nguvu zote kuweka hatua za kupambana na ufisadi na kuleta mabadiliko hasa katika masuala ya utawala wa sheria.
Zelenskiy kwa upande wake amemuahidi Merz kuwa kutafanyika uchunguzi wa wazi kuhusiana na sakata hilo na ameahidi pia kuunga mkono mamlaka huru za kupambana na ufisadi na pia kuchukua hatua za haraka ili kurejesha imani ya raia wa Ukraine, washirika wake wa Ulaya na wafadhili wa kimataifa.
Vyanzo: AFP/Reuters/DPA