Shirika la habari la Palestina WAFA limeripoti leo kwamba Walowezi hao wameandika maneno ya kibaguzi katika kuta za Msikiti ulioko katika kijiji cha kaskazini magharibi mwa Ukingo wa Magharibimapema Alhamis. Vyombo vingine vya habari vimesema michoro hiyo ya grafiti ilikuwa na matusi dhidi ya Mtume Mohammed kwa Kiebrania.
Jeshi la Israel limesema kuwa linachunguza madai hayo. Hapajaripotiwa majeruhi, lakini picha zinazosambaa katika vyombo vya habari vya Palestina na Israel, zimeonyesha uharibifu katika eneo hilo la ibada.
Imam wa Msikiti huo Ahmed Salman anaelezea zaidi: “Baada ya kufika msikitini alfajiri, nilikuta mlango wa msikiti ukiwa umevunjwa, moto umewashwa ndani, na maandishi ya kibaguzi yaliyochorwa na makundi ya walowezi.”
Vurugu hizo za Walowezi dhidi ya Wapalestina katika Ukingo wa Magharibizimeongezeka tangu kuanza kwa vita vya Gaza mnamo Oktoba mwaka 2023, vilivyochochewa na shambulio la Hamas dhidi ya Israel. Tangu wakati huo pia mashambulizi ya umwagaji damu yanayohusisha Wapalestina na jeshi la Israel yameshamiri katika Ukingo wa Magharibi. Jeshi la Israel, mara kwa mara linashutumiwa kwa kutochukua hatua madhubuti dhidi ya vurugu za Walowezi.
Na huko Gaza, matawi ya kijeshi ya kundi la wanamgambo la Hamas na lile la Islamic Jihad yamesema kuwa yatakabidhi mabaki ya mateka mwingine baadae hii leo kama sehemu ya mpango wa kusitisha mapigano uliosimamiwa na Marekani kati ya Israel na Hamas. Taarifa iliyotolewa na Hamas imesema vikosi vya Al-Quds na kile cha Ezzedine al-Qassam, vitakabidhi mabaki ya mwili wa mmoja wa mateka, ambao umepatikana leo katika eneo la Morag kaskazini mwa mji wa Khan Yunis, kusini mwa Ukanda wa Gaza. Mwanzoni kabisa mwa utekelezaji wa makubaliano hayo ya kusitisha mapigano mnamo Oktoba 10, Hamas ilikabidhi mateka 20 walio hai na miili ya watu 28 waliokufa.
Katika hatua nyingine, Uturuki imesema leo kuwa inatarajia kwamba kikosi cha kimataifa kilichopangwa kupelekwa Gaza, kitatoa hakikisho la kwamba, usitishaji mapigano tete unaweza kudumu. Uturuki iliyo mwanachama wa Jumuiya ya Kujihami NATO, imekuwa mkosoaji mkubwa wa mashambulizi makali ya miaka miwili ya Israel huko Gaza, inayoyataja kuwa ni mauaji ya kimbari. Na wakati huo huo, pia imekuwa na jukumu muhimu na mpatanishi katika juhudi za usitishaji vita, ikitaka kujiunga na kikosi hicho licha ya kupingwa kila mara na Israel.
Katika taarifa yake mjini Ankara, wizara ya ulinzi ilisema Uturuki inaamini kwamba Kituo cha Uratibu wa Kijeshi cha Kiraia (CMCC) kinachoongozwa na Marekani lazima kihakikishe misaada ya kibinadamu inafikishwa Gaza kulingana na sheria za kimataifa.