Mamlaka ya Palestina imeripoti kuwa wanajeshi wa Israel wamewaua wavulana wawili wa Kipalestina wenye umri wa miaka 15 katika Ukingo wa Magharibi unaokaliwa kwa mabavu, huku Israel ikiwaita wavulana hao “magaidi” waliokuwa wakielekea kufanya shambulio.
Katika taarifa yake, jeshi hilo la IDF lilisema na hapa nanukuu “Muda mfupi uliopita, wanajeshi waliokuwa wakifanya operesheni karibu na jamii ya Karmei Zur waliwaua magaidi wawili waliokuwa njiani kwenda kufanya shambulio la kigaidi.”
Hata hivyo, jeshi hilo halikutoa maelezo zaidi huku mamlaka ya Palestina pia haikutoa maelezo ya ziada kuhusu tukio hilo.
Mauaji hayo yametokea katika wakati ambapo mivutano kati ya walowezi wa Israel na Wapalestina katika Ukingo wa Magharibi imeongezeka katika wiki za hivi karibuni, hali ambayo imezua shutuma na hata ukosoaji wa nadra kutoka ndani ya jeshi na serikali ya Israel.
Na katika tukio jingine, wizara ya Mambo ya Nje ya Mamlaka ya Palestina yenye makao yake Ramallah imesema walowezi wa Israel wameteketeza moto msikiti wa Hajja Hamida ulioko karibu na mji wa Deir Istiya, kaskazini mwa Ukingo wa Magharibi.
Wizara hiyo imeeleza kuwa tukio hilo linakiuka wazi utakatifu wa maeneo ya ibada na linaonyesha ubaguzi uliokita mizizi unaowaongoza walowezi chini ya ulinzi wa serikali ya uvamizi.
Picha za shirika la habari la AFP zimeonyesha nakala za kitabu kitakatifu kwa Waislamu cha Quran zilizochomwa na kuta za msikiti zilichorwa kwa maandishi ya chuki.
Jeshi la Israel limesema vikosi vya usalama vimetumwa katika eneo hilo baada ya kupokea taarifa kuhusu washukiwa walioteketeza msikiti huo, lakini hakuna mtu yeyote aliyekamatwa.
Uchunguzi wa tukio hilo umehamishiwa kwa polisi wa Israel na taasisi za usalama.
IDF imelaani tukio hilo na kusema itaendelea kuhakikisha usalama na utulivu katika eneo hilo.
Katibu Mkuu wa Umoja wa Mataifa, Antonio Guterres, pia amelaani shambulio hilo kupitia msemaji wake, akieleza “Matendo ya vurugu yanayolenga maeneo ya ibada kamwe hayakubaliki.”
Kuchomwa moto kwa msikiti huo wa Hajja Hamida kumetokea siku moja tu baada ya mkuu wa jeshi la Israel Luteni Jenerali Eyal Zamir kuahidi kusitisha vurugu zinazofanywa na walowezi.
Israel imeukalia Ukingo wa Magharibi tangu mwaka 1967 na zaidi ya walowezi wa Israel 500,000 wanaishi katika maeneo ya maakazi yaliyojengwa katika eneo hilo.
Wakati huo huo, Israel imethibitisha kupokea mwili wa mmoja wa mateka wanne wa mwisho waliokuwa wakishikiliwa na kundi la Hamas katika Ukanda wa Gaza, kama sehemu ya makubaliano ya kusitisha mapigano na Hamas.
Jeshi la Israel limeeleza kuwa wataalamu wa uchunguzi wa maiti wamethibitisha kuwa mwili huo ni wa Meny Godard, mwanamume aliyekuwa na umri wa miaka 73 wakati alipouawa katika shambulio la Hamas mnamo Oktoba 2023.