Kikao hicho maalumu kinafanyika leo Ijumaa mjini Geneva. Mataifa wanachama watauangazia muswada wa azimio linaloomba kupelekwa ujumbe wa dharura wa Umoja wa Mataifa utakaochunguza na kupata ukweli kuhusu ukiukwaji wa hivi karibuni unaodaiwa kufanywa na wanamgambo wa RSF na washirika wao huko al-Fasher, pamoja na kuwatambua wahusika.
Mkuu wa Shirika hilo la Haki za Binaadamu la Umoja wa Mataifa Volker Turk amesema kwenye hotuba yake ya ufunguzi kwamba jamii ya kimataifa inatakiwa kuchukua hatua.
“Hali ni ya kutisha sana al-Fashir. Ninachohofia ni kwamba, tunapozungumza sasa, tunaweza kuona haya yanajirudia huko Kordofan Kaskazini. Kwa hivyo natumai kwamba jumuiya ya kimataifa sasa itaamka, licha ya tahadhari tulizotoa mwaka mzima kwamba wao wamesahaulika, na ndiyo maana tunaona kinachotokea sasa Darfur na haswa al-Fashir.” alisema Turk.
Mji wa Kordofan waanza kushuhudia mateso na mauaji
Tayari mauaji na mateso yamekwishaanza kushuhudiwa kwenye mji wa Kordofan, hii ikiwa ni kulingana na baadhi ya wakaazi wa eneo hilo. Miongoni mwao waliozungumza amesema wanamgambo wa RSF huvamia nyumba zao na kuanza kuwapiga na kuwatesa na mara nyingine kuwaua bila ya sababu ya msingi.
Amesema, “Mlango wa nyumba huko Bara ulikuwa wazi na huwezi kuufunga. Milango inabaki wazi, kisha unakaa kuwasubiri RSF. Kama wasipokukuta chumbani ama bafuni, wanawaua watu wengine wengi. Kwa hiyo inabidi ukae kuwasubiri. Wanaingia, na wakifika tu kabla ya kusema ama kukuuliza chochote wanakupiga vibaya sana, hadi mwili unakufa ganzi. Mimi walinipiga kichwani hadi nikahisi kama nimepigwa na umeme.”
Umoja wa Mataifa umesema damu nyingi inayomwagika kwenye mji huo wa al-Fashir inautia “doa” ulimwengu, ambao umeshindwa kuvimaliza vita na machafuko.
Kulingana na Turk, picha zilizopigwa kutokea angani zimeonyesha damu zilizoganda ardhini. Amesema, maafisa wake wanakusanya ushahidi wa ukiukwaji na ambao utatumika kwa ajili ya kuwawajibisha wahusika na kwamba tayari Mahakama ya Kimataifa ya Makosa ya Uhalifu, ICC imeashiria kwamba inafuatilia kwa karibu hali hiyo.
Akasema, wale wote wanaohusika kwenye mzozo huu wajue ya kwamba wanawaona na mkono wa sheria utachukua mkondo wake.