Kamishna huyo mkuu wa haki za binadamu wa Umoja wa Mataifa, ametaka kukomeshwa kwa vurugu na Israel kuwachukulia hatua za kisheria wote wanaohusika. Msemaji wa Kamishna huyo, Thameen Al-Kheetan amesema mkuu huyo wa haki za binadamu pia aliitaka Israel kukomesha “uwepo wake kinyume cha sheria katika ardhi ya Palestina inayokaliwa kimabavu, kusitisha mara moja shughuli zote za ujenzi wa makaazi mapya na kuwahamisha walowezi wote.
“Mashambulizi mengi ya walowezi yalirekodiwa Oktoba kuliko mwezi wowote tangu 2006, zaidi ya mashambulizi 260. Tangu Oktoba 7 2023 hadi Novemba 13 2025, vikosi vya Israel na walowezi wamewaua Wapalestina 1,017 katika eneo linalokaliwa la Ukingo wa Magharibi ikiwemo Jerusalem Mashariki. Miongoni mwa wahanga watoto walikuwa 221. “
Takwimu hizo hazijumishi idadi ya Wapalestina waliouawa kizuizini mwa Israel. Ndani ya kipindi hicho pia Waisraeli 59 waliuawa katika mashambulizi yanayodaiwa kufanywa na Wapalestina au wakati wa makabiliano ya silaha. Kuongezeka kwa ghasiakunakuja wakati viongozi wa Israel wakizidisha ubomoaji wa nyumba, unyakuzi wa mali, kukamatwa na vizuizi vya kusafiri, pamoja na ujenzi wa makaazi na vituo vya nje na uhamishaji wa maelfu ya Wapalestina kunakofanywa na walowezi wa Israeli na wanajeshi.
Na kwingineko, Israel imerejesha miili ya Wapalestina 15 huko Gaza, kwa mujibu wa maafisa katika hospitali ya Nasser mjini Khan Younis, ikiwa ni hatua ya hivi karibuni katika utekelezaji wa mpango tete wa usitishaji mapigano uliosimamiwa na Marekani. Miili hiyo imerejeshwa baada ya wanamgambo wa Hamas alhamis jioni kukabidhi mabaki ya mwili wa mateka mmoja kati ya wanne waliosalia waliochukuliwa katika shambulio la oktoba 7, 2023.
Israel imeutambua mwili wa mateka huyo kuwa ni wa Meny Godard, aliyetekwa nyara katika kijiji cha kijamii cha Be’eri kusini mwa Israel na mke wake aliuawa wakati wa shambulio hilo. Kulingana na matawi ya kijeshi ya Hamas na lile la Islamic Jihad, mwili wa Godard ulipatikana kusini mwa Ukanda wa Gaza huku miili mitatu ya mateka iliyosalia Gaza ikiendelea kutafutwa.
Kwa kila mwili mmoja wa mateka, Israel inatakiwa kukabidhi miili 15 ya Wapalestina ikiwa ni sehemu ya makabidhiano yaliyokubaliwa katika awamu ya kwanza ya usitishaji vita. Hadi sasa jumla ya miili 330 ya Wapalestina imepokelewa, kati yake ni 95 tu iliyotambuliwa kwa mujibu wa wizara ya afya ya Gaza. Mabadilishano hayo yameendelea licha ya Israel na Hamas kushutumiana kwa kukiuka masharti mengine ya mkataba huo.