Baraza hilo la Haki za Binaadamu limeidhinisha azimio hilo, huku pia likiamuru kupelekwa kwa ujumbe huru wa Umoja wa Mataifa wa kusaka ukweli kuhusu madai hayo na kuhakikisha wanawatambua washukiwa na “wanawajibishwa”.
Uamuzi huo umefikiwa mwishoni mwa kikao maalum kilichoitishwa kwa ajili ya kushughulikia hali inayoshuhudiwa huko El-Fasher, huku Umoja wa Mataifa ukiwa unatoa rai kwa jumuiya ya kimataifa kuingilia kati, kufuatia taarifa za kuongezeka kwa uhalifu dhidi ya ubinadamu na kitisho cha mauaji ya kimbari.
Mapema leo, alipofungua kikao hicho, Mkuu wa Ofisi ya Haki za Binaadamu kwenye umoja huo Volker Turk alisema “damu” iliyomwagika huko El-Fasher imelitia doa kubwa jamii ya kimataifa iliyoshindwa kuumaliza mzozo nchini Sudan na kuongeza kuwa picha zilizopigwa kutokea angani zimeonyesha ardhi ya El-Fasher ikiwa na damu za raia waliouawa.
“Kwa hivyo hakuna hata mmoja wetu anayepaswa kushangazwa na ripoti kwamba tangu RSF ilipoudhibiti wa El Fasher, kumekuwa na mauaji ya halaiki ya raia, ya kikabila, unyanyasaji wa kijinsia ikiwa ni pamoja na ubakaji wa makundi, utekaji nyara kwa ajili ya vikomboleo, kuwekwa vizuizini kiholela, mashambulizi kwenye vituo vya afya, wafanyakazi wa tiba na wa huduma za kibinadamu, pamoja na ukatili mwingine mbaya.”
Balozi wa Uingereza Kumar Iyer, ambaye nchi yake iliomba kikao hicho maalum kando ya Ujerumani, Ireland, Uholanzi na Norway, alionya kwamba kwa kuzingatia “ukubwa na uzito wake, mgogoro huo sasa hauwezi tena kushughulikiwa kimyakimya”.
Kabla ya azimio hilo la Ijumaa kuidhinishwa, aliyatolea wito mataifa mengine kulipitisha akisema vinginevyo wahusika hawatawajibishwa na mzunguko huo wa kutowajibishwa utaendelea. Hata hivyo baadhi ya mataifa yalilipinga azimio hilo, ikiwa ni pamoja na Sudan iliyojitenga na baadhi ya vipengele vinavyotaka kutanuliwa kwa wigo wa uchunguzi wa ujumbe wa kusaka ukweli.
Umoja wa Mataifa unakadiria karibu watu 100,000 wamekimbia El-Fasher katika kipindi cha wiki mbili zilizopita, wengi wakielekea Tawila, iliyoko umbali wa kilomita 50. Tangu mzozo huo ulipoanza Aprili 2023, kati ya jeshi la Sudan na wanamgambo wa RSF, maelfu ya watu wameuawa na karibu watu milioni 12 wamekimbia makazi yao.