Kiongozi wa wapiganaji wa RSF alisema Jumatatu jioni kwamba wapiganaji wake wangeanza mara moja kusitisha mapigano kwa kipindi cha miezi mitatu kwa misingi ya kibinadamu, baada ya Rais wa Marekani Donald Trump kusema wiki iliyopita kuwa angeingilia kati kutafuta usitishaji wa vita ambavyo vimeitumbukiza nchi hiyo katika baa la njaa.
Marekani, Umoja wa Falme za Kiarabu (UAE), Misri na Saudi Arabia, mapema mwezi huu vilipendekeza mpango wa usitishaji mapigano wa miezi mitatu ukifuatiwa na mazungumzo ya amani.
RSF ilijibu kwa kusema imekubali mpango huo, lakini muda mfupi baadaye ikashambulia maeneo ya jeshi kwa mashambulizi ya kutumia droni.
Taarifa ya Jumatatu ilionekana kutangaza kusitishwa kwa mapigano kwa upande mmoja. Ilitolewa siku moja baada ya mkuu wa jeshi la Sudan kukataa mapendekezo ya nchi nne na kukosoa kujumuishwa kwa Umoja wa Falme za Kiarabu kama msuluhishi – UAE imeshutumiwa pakubwa kwa kwaitumia silaha wapiganaji wa RSF.
Hata hivyo nchi ya UAE imekanusha tuhuma hizo na imesema inalenga kusimamisha vita.
Kwa nini jeshi la Sudan limekataa pendekezo la Trump
“Kwa kujibu juhudi za kimataifa, hasa za Mheshimiwa Rais wa Marekani Donald Trump… natangaza kusitisha vita kwa misingi ya kibinadamu, ikiwa ni pamoja na kusitisha uhasama kwa miezi mitatu,” alisema Jenerali Mohamed Hamdan Dagalo wa RSF katika hotuba yake ya Jumatatu.
“Tunayatarajia mataifa manne kutekeleza wajibu wao wa kuliweka upande mwingine katika hatua hii,” aliongeza.