Kura ya maoni iliyofanywa na CBS News ikishirikiana na kampuni ya utafiti ya YouGov imeonyesha kuwa Wamarekani wengi wanapinga hatua zozote za kijeshi dhidi ya Venezuela.
Utafiti huo ambao ulifanyika kati ya Novemba 19 na 21, ulishirikisha Wamarekani 2,489.
Asilimia 70 ya waliohojiwa wameeleza upinzani wao kwa hatua yoyote ya kijeshi ya Marekani nchini Venezuela, huku 30% wakiunga mkono.
Agosti mwaka huu, Rais wa Marekani, Donald Trump alitoa amri ya utendaji ya kuongeza matumizi ya jeshi kwa madai ya kupambana na magenge ya madawa ya kulevya huko Amerika ya Kusini.
Katika muktadha huo, Washington imetangaza kutumwa manowari na meli za kivita kwenye pwani ya Venezuela, huku Waziri wa Vita wa Marekani, Pete Hegseth akisema jeshi liko tayari kwa operesheni, ikiwa ni pamoja na kuuondoa madarakani utawala nchini Venezuela.
Rais wa Venezuela, Nicolas Maduro amejibu hatua hiyo kwa kutoa amri ya kuwekwa tayari wanajeshi milioni 4.5 nchini humo, na kwamba yuko tayari kuzima shambulio lolote.
Hatua ya Marekani ya kutuma meli ya kivita ya kubeba ndege, USS Gerald R. Ford, ambayo ndiyo kubwa zaidi duniani, pamoja na meli zingine tano za kivita kwenda Amerika ya Kusini, na kuua raia wa kawaida wa Venezuela imekosolewa vikali na jamii ya kiimataifa ikitajwa kuwa ya kichokozi, hatarishi, na kinyume cha sheria za kimataifa.