“Sera za waziri mkuu Benjamin Netanyahu zimepelekea kushindwa Israel katika pande zote za kidiplomasia, kijeshi, na kimkakati, hususan dhidi ya Iran”. Hayo ni kwa mujibu wa Haaretz, gazeti la Israel linalochapishwa kwa lugha ya Kiebrania.
Katika makala iliyochapishwa na gazeti hilo, mwanahabari wa Israel Nehemia Shtrasler amesema, “Netanyahu ameiletea Israel hasara ya kimkakati katika pande zote za kidiplomasia na kijeshi.”
Shtrasler ameendelea kuandika kuwa, hadhi ya zamani iliyokuwa nayo Israel kama “mwana mpendwa” wa Washington sasa imehamia Saudi Arabia, na nafasi yake kimataifa iko katika kiwango cha chini mno.
Kwa mujibu wa mwandishi huyo wa Haaretz, kushindwa kukubwa zaidi kwa Netanyahu, ni katika upande wa kukabiliana na Iran, ambapo ushawishi wa kijeshi na kisiasa wa Tehran ni imara zaidi sasa hivi kuliko ulivyokuwa hapo awali.
Mara baada ya vita vya siku 12, Netanyahu alidai kwamba, Israel iliweza kuondoa vitisho viwili dhidi ya uwepo wake: tishio la nyuklia na hatari ya makombora 20,000 ya balestiki.
Hata hivyo Shtrasler ameandika: “[Israeli] haikuondoa chochote. Iran haikusalimu amri. Haiko tayari kukubali ukaguzi wowote wa mpango wake wa nyuklia na inazalisha makombora mapya ya balestiki kwa kasi [kubwa]. Hivi majuzi Tehran ilitangaza kwamba itarusha makombora 2,000 kwa siku katika mzozo ujao na Israel”.
Kwa mujibu wa mwandishi huyo, kushindwa kwa pili kubwa kwa Netanyahu kulitokea wakati wa mauaji ya kimbari ya Ghaza, ambayo, tangu Oktoba 7, 2023, yameua kwa uchache watu 71,000 na kuwajeruhi 172,000, wengi wao wakiwa wanawake na watoto.
Shtrasler amesema, licha ya utawala wa kizayuni kutumia rasilimali nyingi za kijeshi na kisiasa ili kuishinda harakati ya Muqawama wa Palestina Hamas, umegonga mwamba katika kufikia lengo hilo, kwa sababu Hamas inaendelea kuidhibiti Ghaza, inao wapiganaji 20,000 walio tayari kukabiliana na Israel, na imebaki kuwa na umaarufu mkubwa sana miongoni mwa Wapalestina.
Mwandishi huyo wa Haaretz ameendelea kukumbusha pia kwamba, harakati ya Hizbullah nayo pia haijasalimu amri na imekataa kukabidhi silaha zake; na akasema: “inajenga upya miundombinu yake, inaandaa wapiganaji, inajenga muundo wa kamandi, na kukusanya silaha” …/