Duru zenye taarifa zimedokeza kuwa, mkutano kati ya Rais wa Marekani Donald Trump na Mwanamfalme wa Saudi Arabia Mohammed bin Salman uliofanyika wiki iliyopita katika Ikulu wa White House ulishuhudia mvutano wa dhahiri kwa sababu Trump aliishinikiza Riyadh ijiunge na Mkataba wa Abraham, wa kuanzisha uhusiano rasmi na utawala wa kizayuni wa Israel.
Kwa mujibu wa duru hizo, mashinikizo hayo yametolewa huku Saudia ikiendelea kufungamanisha hatua yoyote ya kuanzisha uhusiano rasmi na Israel na kuwepo mchakato wa kisiasa “wa kuaminika na unaojifunga na muda” utakaopelekea kuundwa nchi huru ya Palestina, wakati Rais wa Marekani anapigania kuanzisha makubaliano ya kikanda yakayozijumuisha Riyadh na Tel Aviv.
Kwa mujibu wa Chaneli ya 12 ya utawala wa kizayuni, maafisa wawili wa Marekani wameyaelezea mazungumzo ya Trump na Bin Salman kwamba yalikuwa “magumu”, na kubainisha kuwa, rais wa Marekani “alikatishwa tamaa na kukasirika” kutokana na kukataa Mwanamfalme wa Saudi Arabia kukamilisha suala la kuanzisha uhusiano wa kawaida na Israel katika wakati huu.
Ripoti zinasema Ikulu ya White House ilikuwa imemjulisha Bin Salman kabla ya mkutano huo kwamba Trump alitarajia uwepo “upigaji hatua” katika suala hilo. Hata hivyo, mazungumzo hayo ya Jumanne iliyopita yalikuwa magumu wakati Trump alipoibua suala hilo na kutumia mashinikizo ya moja kwa moja kwa Riyadh kuitaka ijiunge na makubaliano ya Abraham.
Duru zinasema, Mrithi wa Ufalme wa Saudi Arabia aliisukuma ajenda ya mazungumzo “upande tofauti”, akisisitiza kwamba Riyadh “haiwezi kuchukua hatua kama hiyo kwa sasa”, kutokana na uadui ulionao umma wa Saudia dhidi ya Israel baada ya vita vya Ghaza, na kwamba jamii ya nchi hiyo “haiko tayari” kwa makubaliano ya kuanzisha uhusiano na Israel katika hatua ya sasa…/