Umoja wa Mataifa umekaribisha kwa tahadhari tangazo la kibinadamu la kusitisha mapigano lililotolewa jana na wanamgambo wa Kikosi cha Msaada wa Haraka (RSF), ukisema kuwa linawakilisha kupiga hatua lakini linahitaji kuidhinishwa kupitia hatua maidanini.
Stephane Dujarric Msemaji wa Umoja wa Mataifa amesema kuwa tangazo hilo la usitishaji vita wa kibinadamu kwa muda wa miezi mitatu lililotolewa jana na kikosi cha RSf ni hatua moja kuelekea katika mwelekeo sahihi hata hivyo la muhimu ni kuthibitisha nia njema kwamba usitishaji vita huo ni lazima uwalinde raia, uruhusu kuingizwa misaada ya kibinadamu kwa kiasi kikubwa na kuuruhusu Umoja wa Mataifa kufanya shughuli zake kwa uhuru.
Dujarric amesema bila shaka watautahini usitishaji vita huo uliotangazwa na wanagambo wa RSF kwa kuwa wanataka kuwafikia raia wengi wa kadiri inavyowezekana.
Siku ya Jumatatu Mohamed Hamdan Dagalo Kamanda wa wanamgambo wa RSF alisema kuwa wapiganaji wake wamekubali kusitisha mapigano ya ndani haraka iwezekanavyo kwa muda wa miezi mitatu kwa sababu za kibinadamu ambako kunajumuisha kusitishwa uhasama; siku moja baada ya mkuu wa Baraza la Mpito la Sudan, Abdel Fattah al-Burhan, kukaataa pendekezo la Marekani kwa ajili ya kusitisha mapigano.
Kwa upande wake serikali ya Sudan imeutaja usitishaji mapigano huo kwa upande mmoja kuwa ni ujanja wa wazi wa kisiasa.
Awali, Mkuu wa Baraza la Utawala wa Mpito nchini Sudan, Abdel Fattah al-Burhan alikuwa ametangaza kwamba “hakuna pingamizi la kusitishwa mapigano, iwapo wanamgambo waasi wataondoka katika maeneo waliyoyavamia baada ya makubaliano ya Jeddah.”
Abdel Fattah al-Burhan, pia amekataa pendekezo lililowasilishwa na mshauri wa Rais wa Marekani kuhusu masuala ya Kiarabu na Afrika, Massad Boulos, juu ya utatuzi wa mgogoro wa Sudan akilitaja pendekezo hilo kuwa ndilo “baya zaidi kuwahi kuwasilishwa”