Antonio Guterres Katibu Mkuu wa Umoja wa Mataifa amesema kuwa anafuatilia matukio ya Guinea Bissau kwa wasiwasi mkubwa baada ya baada ya jeshi la nchi hiyo jana Jumatano kumuondoa madarakani Rais Umaro Sissoco Embalo wa nchi hiyo.
Stephane Dujarric Msemaji wa Katibu Mkuu wa Umoja wa Mataifa amesema kuwa Katibu Mkuu wa UN amewatolea wito washika dau wote nchini Guinea Bissau kuheshimu utawala wa sheria. Ameongeza kuwa, Katibu Mkuu wa Umoja wa Mataifa ataendelea kufuatilia kwa karibu hali ya mambo ya Guinea Bissau inavyoendelea.
Mapema jana jeshi la Guinea Bissau lilimpindua madarakani Rais Embalo na kufunga mipaka ya nchi kavu, baharini na anga ya nchi hiyo likidai kuwa limefichua njama za kuliyumbisha taifa.
Kundi la maafisa wa jeshi waliojitambulisha kama “Kamandi Kuu ya Kijeshi kwa ajili ya Kurejesha Usalama wa Taifa na Utulivu lilitangaza “kuchukua madaraka kamili ya kuiongoza nchi” katika taarifa iliyotangazwa kwenye televisheni ya serikali jana Jumatano.
Jeshi la Guinea Bissau limesitisha shughuli zote za vyombo vya habari na kuzuia mchakato wa uchaguzi uliokuwa ukiendelea, limefunga mipaka yote ya nchi hiyo na kuweka amri ya kutotoka nje ya masaa tisa kuanzia saa tatu usiku.
Jeshi la Guinea Bissau limefanya mapinduzi wakati nchi hiyo ikisuburi kutangazwa matokeo ya uchaguzi wa rais.