Wanajeshi hao, waliojitambulisha kama “Uongozi wa juu wa kijeshi kwa ajili ya kurejesha utulivu” wamesema katika taarifa iliyopeperushwa kupitia televisheni ya taifa kwamba wamemuondoa madarakani Rais Umaro Sissoco Embaló, katika tukio la hivi karibuni kabisa la machafuko katika nchi hiyo ambayo imekumbwa na mapinduzi mara kadhaa.
Baada ya kuapishwa katika sherehe iliyofanyika makao makuu ya jeshi, Jenerali Horta N’Tam, amesema, “Nimeapishwa kuwa Rais wa Kamandi ya Juu ya Kijeshi yenye jukumu la kurejesha usalama wa kitaifa pamoja na utulivu wa kijamii.”
Makumi ya wanajeshi waliokuwa na silaha nzito walikuwa wameshika doria wakati Rais huyo wa mpito alipokuwa na mkutano na waandishi wa habari na kuwaeleza kwamba uamuzi waliouchukua ulihitajika ili kuzuia kile alichokiita “kuzuia mipango iliyolenga kutishia demokrasia ya nchi hiyo.”
Mji mkuu wa Bissau ulikuwa kimya leo huku wanajeshi wakipiga doria mitaani na watu wengi wakisalia majumbani hata baada ya amri ya kutotoka nje usiku kuondolewa. Shughuli nyingi za biashara zimesimama na benki zimefungwa.
Hatua ya jeshi kuchukua usukani wa taifa imetokea siku moja kabla ya kutangazwa kwa matokeo ya awali katika kinyang’anyiro cha urais wa taifa hilo la Afrika Magharibi ambalo ni kitovu cha biashara ya ulanguzi wa dawa za kulevya aina ya Cocaine.
Ushindani ulikuwa unatajwa kuwa kati ya Rais Embalo na Fernando Dias, mwanasiasa mwenye umri wa miaka 47. Dias anayedai kushinda kinyang’anyiro cha urais, amemtuhumu rais Embalo kwa kuyatengeneza mapinduzi hayo ya kijeshi ili achukue ushindi wa uchaguzi huo.
Kundi la wanajeshi jana Jumatano lilitangaza kwamba limechukua udhibiti kamili wa nchi hiyo na kusimamisha mchakato wa uchaguzi, wakati wananchi walikuwa wanasubiri kutangaziwa leo Alkhamisi, matokeo rasmi ya zoezi la uchaguzi uliofanyika Jumapili na ambao Rais Umaro Sissoco Embalo alitarajiwa kushinda.
N’Tam atajwa kuwa mshirika wa karibu wa Rais Embalo
N’Tam, ambaye alihudumu kama mkuu wa majeshi ya nchi hiyo, katika miaka ya hivi karibuni anatajwa kuwa mshirika wa karibu wa Rais Embalo.
Guinea-Bissau, iliyoko katikati ya Guinea na Senegal, imeshuhudia mapinduzi mara nne tangu ilipopata uhuru wake kutoka Ureno mnamo mwaka 1974, pamoja na majaribio mengine kadhaa ya mapinduzi yaliyoshindikana.
Wakati huo huo, Umoja wa Afrika AU umetoa wito kwa utawala wa kijeshi kumuachilia mara moja na bila masharti Rais Umaro Sissoco Embaló.
Katika taarifa iliyochapishwa kwenye mtandao wa kijamii wa X, Mwenyekiti wa Halmashauri Kuu ya Umoja wa Afrika Mahmoud Ali Youssouf ameutaka utawala huo wa kijeshi kumuachilia Embalo na maafisa wengine waliokamatwa pamoja na kuhimiza pande zote kuonyesha uvumilivu.
Umoja wa Afrika pia umekosoa vikali mapinduzi hayo na kusisitiza kile walichokiita “ulazima wa kuheshimu mchakato wa uchaguzi unaoendelea.”
Guinea-Bissau ni miongoni mwa nchi maskini zaidi duniani na pia ni kitovu cha biashara ya dawa za dawa za kulevya aina ya Cocaine kati ya Amerika ya Kusini na Ulaya, biashara inayochochewa na historia ndefu ya misukosuko ya kisiasa nchini humo.