Jeshi la Israel limeamua kuwapiga marufuku makamanda wake kutumia simu za Android kutokana na usalama mdogo uliomo kwenye simu zinazotumia mifumo hiyo.
Kwa mujibu wa Shirika la Habari la Fars; Jeshi la Israel limetoa miongozo mipya kuhusu matumizi ya simu za mkononi kati ya maafisa wake huku likiendelea kufanya uchunguzi wa kina kuhusu usalama kwenye mifumo ya kidijitali.
Redio ya Jeshi la Israel imetangaza usiku wa kuamkia leo Alkhamisi kwamba uamuzi huo ni matokeo ya tafiti zilizofanywa baada ya “matukio ya Oktoba 7;” tafiti ambazo, kwa mujibu wa jeshi hilo, zimeonysha kwamba kuna udhaifu wa kijasusi uliojitokeza wakati makamanda wa kijeshi walipotumia vifaa erevu kama vile vinavyotumia mifumo ya Android.
Hadi hivi sasa, jeshi la Israel lilikuwa limeruhusu baadhi tu ya maafisa wake wenye cheo cha kanali kutumia simu erevu na kupiga marufuku kabisa matumizi ya vifaa vya kidijitali vinavyotumia mifumo ya Android kutokana na kutumika sana kwenye masuala ya kijasusi.
Taarifa hiyo imesema, kuanzia sasa, maafisa wa cheo cha “Luteni Kanali” pia watakuwa kwenye orodha ya wale watakaopigwa marufuku kabisa kutumia Android kwenye kazi zao.
Jeshi la Israeli limedai kwamba mifumo ya Android ni rahisi zaidi kupenya ndani yake na si salama kutumiwa na maafisa wa kijeshi kwenye operesheni zao.
Kwa mujibu wa amri hiyo mpya, maafisa wa jeshi la Israel wataruhusiwa kuendelea kutumia Android kwa mambo yao binafsi, lakini kwa sharti kwamba wasiwe na mawasiliano yoyote ya kiutendaji.