Katibu wa Baraza Kuu la Usalama wa Taifa la Iran amesisitiza katika mkutano na wasomi wa Pakistan kwamba vita vya siku 12 ilivyolazimishwa Iran kupigana ni matokeo ya njama kubwa za Marekani na utawala wa Kizayuni na vilipangwa miaka mingi nyuma.
Ali Larijani alisema hayo jana Jumatano kabla ya kurejea hapa Iran, katika mkutano na kundi la wakuu wa vyuo vikuu na taasisi za elimu za Pakistan alioonana nao kwenye ubalozi wa Iran mjini Islamabad na kuongeza kwamba vita vya siku 12 ni matokeo ya njama ya Wamarekani na Wazayuni iliyopangwa miaka iliyopita.
Kwa mujibu wa Pars Today, Dk Larijani mesema kwamba msimamo imara wa Kiongozi Muadhamu wa Mapinduzi ya Kiislamu na imani thabiti ya taifa la Iran ilishinda silaha za kisasa za adui. Kuwa taifa la Iran na maelfu ya miaka ya historia ya ustaarabu ni siri nyingine ya ushindi huo. Katika upande mkabala na huo, yaani utawala vamizi na pandikizi wa Kizayuni, leo hii umekumbwa na mmomonyoko wa maadili, kuporomoka itibari yake na machafuko ya ndani.
Katika sehemu nyingine ya hotuba yake, Katibu wa Baraza Kuu la Usalama wa Taifa la Iran amegusia mazungumzo kati ya Iran na Marekani na kusema kwamba inachotaka Iran ni mazungumzo ya kweli si mazungumzo ya kidanganyifu.
Kuhusu uhusiano wa Iran na Pakistan, Larijani amerejea kusema kuwa uhusiano kati ya nchi hizi mbili una misingi imara ya kiutamaduni na kidini, akisisitiza kwamba Iran haisiti kutumia fursa yoyote ya kuendeleza ushirikiano na Pakistan na kwamba kuna majukwaa mbalimbali ya kustawisha zaidi uhusiano wa kiuchumi.
Watu mashuhuri wa Pakistan wameipongeza Jamhuri ya Kiislamu na wananchi wa Iran kwa Muqawama wao wa kupigiwa mfano mbele ya njama za maadui wa Uislamu.