Marekani imeingiwa na kiwewe kikubwa cha kudukuliwa kombora lake la GBU-39B lililopatikana nchini Lebanon na kuziruhusu nchi zisizo rafiki kwake hasa Iran na Russia kupata teknolojia iliyotumika kwenye kombora hilo la kisasa na kuwa hatari kwa Marekani na utawala wa Kizayuni.
Kwa mujibu wa Shirika la Habari la Fars; baadhi ya duru za habari zimeripoti kwamba Marekani imeiomba serikali ya Lebanon kuirudishia kombora la GBU-39B lililotumika kufanya jinai mjini Beirut lakini halikuripuka.
Vyombo vya habari vya Israel vimeripoti kuwa, Washington ina wasiwasi mkubwa kwamba teknolojia ya kombora hilo la kisasa, jepesi na linaloongozwa kwa usahihi wa hali ya juu, litakuwa mikononi mwa pande zisizo rafiki kwa Marekani hasahasa Iran na Russia na imeiomba serikali ya Lebanon kulirejesha kombora hilo kwa Marekani licha ya kwamba lilivurumishwa nchini Lebanon kwa ajili ya kufanya jinai na mauaji dhidi ya raia wa nchi hiyo.
Chanzo kimoja cha kijeshi cha Lebanon kimethibitisha kutolewa ombi hilo na Marekani na kuongeza kuwa: “Ombi la Marekani limetumwa kwa jeshi la Lebanon.”
Afisa huyo wa kijeshi wa Lebanon ameongeza kuwa utaratibu wa kurejeshwa kombora hilo na jinsi litakavyofikishwa mikononi mwa Marekani ni mambo ambayo bado hayajakamilika.
Katika hali ya kukosa haya wala soni usoni, Marekani imejipa uthubutu wa kutaka kurejeshewa kombora ambalo imelitumia kiuadui kwa ajili ya kuua raia wa Lebanon.
Kombora hilo ambalo halikufyatuka lilitumika kwenye mashambulio ya kikatili ya utawala wa Kizayuni kwenye eneo la kusini mwa Beirut siku ya Jumapili mashambulio ambayo yalipelekea kuuawa shahidi “Haytham Ali Al-Tabatabai” mmoja wa makamanda wakuu wa Hizbullah na wanachama wengine kadhaa wa harakati hiyo ya Muqawama wa Kiislamu.
Kombora la GBU-39B lina uzito wa pauni 250 linaendeshwa na kuongozwa na Jeshi la Anga la Marekani na utawala wa Kizayuni. Linategemea mwongozo wa setilaiti (GPS) na ingawa ni dogo lakini linasababisha uharibifu mkubwa. Linatumia teknolojia nyeti na ya siri mno.