Wazima moto wa Hong Kong wanawatafuta zaidi ya watu 250 waliotajwa kutoweka, siku moja baada ya moto mbaya zaidi kuwahi kutokea katika mji huo kwa miongo kadhaa na kuua takriban watu 55 katika jengo la makazi. Maafisa wamethibitisha kuwa mmoja wa waliofariki ni mwanakikosi wa zimamoto.
Zaidi ya saa 24 baada ya moto kuanza katika mtaa wa makazi wenye majengo manane na nyumba 2,000, moto ulikuwa bado unawaka kwenye baadhi ya madirisha huku vikosi vikiendelea kunyunyiza maji kwenye kuta.
Lawrence Lee, mkazi wa eneo hilo, alikuwa akisubiri taarifa kuhusu mke wake ambaye bado alikuwa amekwama kwenye ghorofa yao. Anasema, “Moto ulipoanza, alimwambia kwa simu atoke. Lakini alipotoka nje, korido na ngazi zilikuwa zimejaa moshi na kulikuwa giza totoro, hivyo ilimbidi kurudi ndani ya nyumba.”
Wakazi kadhaa wa makaazi ya Wang Fuk Court, iliyoko katika wilaya ya kaskazini ya Tai Po, waliiambia AFP kwamba hawakusikia king’ora cha moto na walilazimika kuenda nyumba kwa nyumba kuwaarifu majirani kuhusu hatari hiyo.
Moto katika majengo manne ulidhibitiwa, huku minara mitatu iliyosalia ikiwa chini ya udhibiti. Mamlaka zilisema operesheni huenda ikaendelea hadi jioni.
Zaidi ya watu 70 walijeruhiwa, kwa mujibu wa Mamlaka ya Hospitali ya jiji hilo, wengi wao wakiwa na majeraha ya moto na matatizo ya kupumua kutokana na kuvuta moshi.
Uzembe kupita kiasi
Tume Huru ya Kupambana na Ufisadi (ICAC) ilisema katika taarifa kwamba, “kutokana na maslahi makubwa ya umma katika suala hili, leo ICAC imeunda kikosi maalum kufanya uchunguzi kamili kuhusu uwezekano wa ufisadi katika mradi mkubwa wa ukarabati wa eneo la makaazi la Wang Fuk Court huko Tai Po.”
Wanaume watatu — wakurugenzi na mshauri wa uhandisi wa kampuni ya ujenzi — walikamatwa kwa tuhuma za kuua bila kukusudia.
Polisi hawakuitaja kampuni wanayofanyia kazi moja kwa moja, lakini Eileen Chung, mkuu mwandamizi wa polisi, alisema “wanayo sababu ya kuamini kuwa wale waliokuwa wakisimamia kampuni hiyo walikuwa wazembe kupita kiasi.”
Polisi walikagua ofisi za Kampuni ya Prestige Construction & Engineering, ambayo shirika la AP lilithibitisha kuwa ndiyo iliyokuwa ikihusika na ukarabati katika majengo hayo. Polisi walichukua masanduku ya nyaraka kama ushahidi, kulingana na vyombo vya habari vya eneo hilo.
Polisi pia walisema walikuta povu la Styrofoam — ambalo huwaka kwa urahisi — likiwa limewekwa kwenye madirisha ya kila ghorofa karibu na eneo la lifti katika mnara mmoja ambao haukuathirika. Inaaminika kuwa liliwekwa na kampuni ya ujenzi, ingawa madhumuni yake hayakufahamika. Simu za kampuni ya Prestige hazikujibiwa.
Kwa nini moto ulienea kwa kasi?
Alex Webb, mtaalamu wa usalama wa moto, alisema tukio hilo “linashtua sana” kwa kuwa kwa kawaida kanuni zinahitaji majengo kuwa na nafasi ya kutosha kati yake ili kuzuia moto kusambaa kutoka jengo moja hadi jingine.
Mhandisi huyo anayehusika na masuala ya usalama katika kampuni ya ujenzi ya CSIRO Infrastructure Technologies nchini Australia alisema kwamba vifaa vilivyotajwa na polisi vinaweza kueleza ni kwa nini moto ulienea kwa kasi.
Moto huo mbaya katika makazi ya Hong Kong umechochea makampuni makubwa ya China na mashirika ya hisani kuahidi mamilioni ya dola za Hong Kong kwa ajili ya msaada wa dharura.
Wakati huo huo, wakazi wa Hong Kong wameandaa misaada yao wenyewe kwa wakazi waliokosa makazi na kwa wazima moto, huku umati ukikusanyika katika mitaa ya jirani na maeneo ya umma kuonyesha mshikamano.