Askari waliofanya mapinduzi ya kijeshii nchini Guinea-Bissau leo Alkhamisi wametangaza kiongozi mpya wa kijeshi wa nchi hiyo, wakiimarisha unyakuzi wa madaraka ulioanza baada ya uchaguzi wa rais nchini humo.
Taarifa iliyotangazwa kwenye televisheni ya taifa imesema: Kamandi Kuu ya Jeshi meimteua Jenerali Horta Inta-A kuwa mkuu wa serikali ya kijeshi, ambayo itasimamia kipindi cha mpito cha mwaka mmoja.
“Kutoweza watendaji wa kisiasa kuzuia kuzorota kwa hali ya kisiasa hatimaye kulisababisha kuingilia kati vikosi vya jeshi,” amesema Jenerali Inta-A, ambaye alikuwa mkuu wa majeshi ya Guinea-Bissau kabla ya mapinduzi hayo na mshirika wa karibu wa Rais aliyeondolewa madarakani, Umaro Sissoco Embaló.
Hadi sasa mahali alipo Embaló hapajulikani. jana Jumatano kiongozi huyo wa zamani wa Guinea aliviambia vyombo vya habari kwamba alikamatwa na wanajeshi huku milio ya risasi ikisikika karibu na ikulu ya rais.
Wakati huo, kambi ya upinzani ilidai kwamba Umaro Sissoco Embaló alikuwa amebuni mapinduzi hayo ili kuepuka kushindwa katika uchaguzi wa rais uliofanyika Jumapili iliyopiita, ambao ulikuwa na ushindani mkubwa.
Chama cha upinzani cha African Party for the Independence of Guinea na Cape Verde kimewataka raia kufanya maandamano dhidi ya mapinduzi hayo na kudai kuchapishwa matokeo ya uchaguzi.
Jeshi la Guinea-Bissau lilimng’oa madarakani Rais Umaro Sissoco Embaló siku ya Jumatano, wakati taifa hilo lilipokuwa likisubiri matokeo ya kura za uchaguzi wa rais na bunge.
Mapinduzi hayo ya kijeshi yametokea huku mgombea huru, Fernando Dias, na Rais Embaló wote wakidai kuibuka na ushindi katika uchaguzi wa rais.
Jumla ya wagombea 12 walichuana katika kinyang’anyiro cha kuwania kiti cha rais, na Tume ya Uchaguzi ilitarajiwa kutangaza matokeo ya mwisho leo Alhamisi.