Bunge hilo limesema kunapaswa kuwa na uchunguzi huru kuhusu mauaji yanayoendelea katika taifa hilo la Afrika Mashariki, watu kupotea kiholela, mateso na matukio mengine ya ukiukwaji wa haki za binaadamu.
Wanachama wa bunge hilo la Umoja wa Ulaya, wamekosoa pia kufungwa jela kwa kiongozi wa chama kikuu cha upinzani CHADEMATundu Antiphas Lissu, kwa kile walichosema ni kesi ya kisiasa. Lissu hakushiriki uchaguzi mkuu na alishitakiwa kwa kosa la uhaini, ambapo adhabu yake ni kifo au kifungo cha maisha. Wanachama hao wametoa wito kwa serikali ya Tanzania kumuachia huru kiongozi huyo wa upinzani mara moja bila masharti yoyote huku likitaka adhafu ya kifo kuondolewa kabisa nchini humo.
Maria Manuel Leitão Marques Vieira ni mbunge wa Umoja wa Ulaya.
“Uchaguzi wa Oktoba unaonyesha namna wapigakura walivyokandamizwa, walinyimwa nafasi yao ya kumchagua wanaemtaka na vikosi vya usalama vilitumia nguvu dhidi yao, leo naihimiza serikali ya Tanzania kumuachia huru Tundulissu na kuchunguza wapinzani wa serikali wanaopotea. Tunajali kuhusu hali ya kibinaadamu Tanzania kwahiyo ni lazima tufanye juhudi zaidi,” alisema Maria Vieira.
Tanzania: Hatutokabiliwa na tatizo kwa kukosa fedha za EU
Bunge limesema kwa sasa serikali ya Samia Suluhu Hassan, inapaswa kushiriki katika mazungumzo ya kisiasa na upinzani, mashirika ya kiraia, pamoja na wawakilishi wa waathiriwa wa ghasia za baada ya uchaguzi ili kutatua mgogoro uliopo ili kutoa nafasi ya uchaguzi mpya ulio huru na wazi.
Kando na hayo yote hapo jana wanachama hao walipitisha azimio mjini Brussels la kuitaka Halmashauri Kuu ya Umoja wa Ulaya, kusitisha msaada wa euro milioni 156 kwa serikali ya Tanzania mwaka ujao 2026 na kuwawekea vikwazo wahusika wa ukandamizaji uliofanywa baada ya uchaguzi Mkuu. Azimio hilo lilipitishwa bila kupingwa kwa kura 539.
Kwa upande wake Tanzania kupitia Waziri wake wa mambo ya nchi za nje Mahmoud Thabit Kombo imesema haitokabiliwa na tatizo lolote lile kwa kukosa fedha hizo za Umoja wa Ulaya, kwa sababu ina bajeti yake na vyanzo vengine vya mapato.
Gazeti la The Citizen la nchini humo limemnukuu waziri Thabit Kombo, akisema Balozi wa Tanzania katika Umoja wa Ulaya, atawasilisha ripoti kwa serikali na baadae serikali hiyo itatoa taarifa rasmi kuhusu uamuzi huo.