Wizara ya Mashauri ya Kigeni ya Iran imelaani vikali jinai zinazoendelea kufanywa na utawala wa Kizayuni katika Ukingo wa Magharibi wa Mto Jordan na mauaji na mateso ya wakaazi wa eneo hilo.
Msemaji wa Wizara ya Mambo ya Nje ya Iran, Ismail Baghaei ameitaka jamii ya kimataifa kuzingatia jinai za kinyama zinazofanyika katika eneo hili la Palestina inayokaliwa kwa mabavu.
Baghaei ameashiria mashambulizi ya mara kwa mara ya jeshi la utawala wa Kizayuni wa Israel na walowezi katika kambi za Wapalestina huko Nablus na Jenin, mauaji ya Wapalestina, kuwakamata kiholela wakaazi wa Ukingo wa Magharibi wa Mto Jordan na kuwatia mbaroni wakaazi wa Ukingo wa Magharibi wa Mto Jordan na kutoa wito wa jamii ya kimataifa kuchukua hatua za kukabiliana na jinai za Israel.
Wakati huo huo, ripoti mpya ya Umoja wa Mataifa imefichua vipengele vipya vya athari za kutisha za vita vya Gaza. Umoja wa Mataifa umetangaza kuwa vita vya utawala wa Kizayuni huko Gaza vimeunda shimo la kutisha na kwamba ujenzi mpya wa ukanda huu utahitaji kwa uchache dola bilioni 70 na muda wa miongo kadhaa, takwimu zinazodhihirisha wazi kina cha janga hili.
Ripoti mpya ya Umoja wa Mataifa kuhusu vita vya Gaza inatoa taswira ya kutisha ya kiwango cha uharibifu na athari za kibinadamu za mzozo huu. Katika ripoti hiyo, Gaza imeelezewa kama “janga lililotengenezwa na mikono ya binadamu”; kauli inayodhihirisha kuwa mgogoro wa sasa si matokeo ya majanga ya kiasili bali ni matokeo ya moja kwa moja ya hatua za kijeshi na kisiasa za Israel.