Jeshi la Israel limezindua mradi mkubwa wa akili mnemba (AI), unaojulikana kama Morpheus, ili kuzuia askari wake kuchapisha ushahidi wa uhalifu wa kivita uliofanyika huko Gaza kwenye mitandao ya kijamii.
‘Zionism Observer’ imesema katika chapisho lake kwenye mtandao wa kijamii wa X kwamba: Mfumo huo mpya kimsingi umeundwa ili kuzuia wanajeshi kutoa taarifa nyeti kwa adui bila kukusudia kwenye mitandao yao ya kijamii.
Mradi wa Morpheus unaoendeshwa na akili mnemba (AI) utafuatilia akaunti za mitandao ya kijamii za wanajeshi na askari wa Israel na kubaini kama kuna video, maandishi au picha zozote wanazochapisha zinazokiuka itifaki za usalama wa taarifa.
Kuzinduliwa kwa Morpheus kunathibitisha wasiwasi unaoongezeka wa Israel kuhusu hatari za kisheria zinazotokana na mienendo ya wanajeshi wake mtandaoni, ambazo zinaweza kutumika kama ushahidi katika mahakama za kimataifa.
Mapema mwezi huu, Taasisi ya Hind Rajab (HRF) iliwasilisha mashtaka ya jinai kwa Ofisi ya Mwendesha Mashtaka Mkuu wa Umma wa Jamhuri ya Czech kuhusu kuhusika kwa mwanajeshi wa Israel katika mauaji ya kimbari dhidi ya watu Gaza.
HRF ilisema mashtaka hayo, yaliyowasilishwa Prague na wakili Jan Taubl, yanafuatia ripoti pana inayoelezea ushiriki wa Noam Tsuriely katika uhalifu wa kivita, uhalifu dhidi ya ubinadamu, vitendo vya mauaji ya kimbari ya Israel dhidi ya Wapalestina.
Rekodi za Tsuriely kwenye mitandao ya kijamii zinaonyesha jinsi mwanajeshi huyo alivyoshiriki katika uhalifu wa kivita katika Ukanda wa Gaza.
Oktoba 2024 pia, HRF iliwasilisha malalamiko katika Mahakama ya Kimataifa ya Jinai (ICC) dhidi ya wanajeshi 1,000 wa Israel kwa uhalifu wa kivita, uhalifu dhidi ya ubinadamu na mauaji ya kimbari.
Kesi hiyo iliambatanishwa na ushahidi wa zaidi ya vipande 8,000 vya nyaraka, ikiwa ni pamoja na picha za mitandao ya kijamii, ripoti za uchunguzi wa kimatibabu na ushuhuda wa mashahidi.
Utawala wa Kizayuni wa Israel umewaua karibu Wapalestina 70,000 na kuwajeruhi wengine wasiopungua 171,000 katika vita vya mauaji ya kimbari huko Gaza.