Kiongozi Muadhamu wa Mapinduzi ya Kiislamu, Ayatullah Sayyid Ali Khamenei amesema kwenye hotuba yake kupitia televisheni ya taifa kwamba, Marekani haina hadhi ya kuwa na mahusiano na Jamhuri ya Kiislamu ya Iran na kwamba vita vya siku 12 vilivyoanzishwa na Marekani na Israel ni vita vilivyopangwa kwa muda wa miaka 20 lakini taifa la Iran limeshinda na adui ameshindwa.
Kiongozi Muadhamu wa Mapinduzi ya Kiislamu amesema hayo usiku wa kuamkia leo Ijumaa (Alkhamisi usiku Novemba 27, 2025) wakati alipozungumza na taifa la Iran kwa njia ya televisheni na kusema: Taifa azizi la Iran ya Kiislamu napenda kusema kwamba, siku hizi ni siku za Jeshi la Kujitolea la Basij na nataka nizungumze nanyi mambo mawili matatu… Kwanza ni lazima fikra ya Basij iendelee kuwepo. Basij ni harakati yenye thamani kubwa kwa taifa. Misukumo ya Basij pia ni misukumo inayopendwa na Mwenyezi Mungu, ni misukumo ya kufanya kazi kwa dhati kwa ghera na kwa kujiamini.
Katika sehemu nyingine ya hotuba yake hiyo, Kiongozi Muadhamu wa Mapinduzi ya Kiislamu amesisitiza kuwa, leo hii fikra ya Muqawama ambayo iliasisiwa nchini Iran, iko, imeenea na kunawiri sehemu zote duniani. Leo hii hata kwenye mitaa ya nchi za Magharibi, nchi za Ulaya na hata Marekani kwenyewe, watu wanajitokeza barabarani na kuunga mkono kwa sauti kubwa Muqawama wa Palestina ambao chimbuko la fikra hiyo ni Iran.
Ayatullah Sayyid Ali Khamenei amezungumzia pia vipengee mbalimbali vya vita vya kulazimishwa vya siku 12 vilivyoanzishwa na Marekani na Israel dhidi ya Iran mwezi Juni 2025 na kusema kuwa: Katika vita vya siku 12, taifa la Iran si tu liliipigisha magoti Marekani lakini pia liliwapiga mweleka Wazayuni. Hilo halina shaka hata kidogo. Maadui walikuja na kufanya shari nchini Iran, lakini wamekula kipigo. Kipigo hicho ni kwa maana halisi ya neno. Ni kweli walifanya shari lakini waliondoka mikono mitupu, hawakuweza kufanikisha hata lengo lao moja.
Kiongozi Muadhamu amegusia pia jinsi Marekani na Wazayuni wengine walivyopanga kuishambulia Iran kwa muda wa miaka 20 na kujiandaa kwa kila kitu kuhusu vita hivyo lakini matokeo yake wamekula kipigo licha ya kwamba walitumia silaha zao za kisasa mno na mbinu zao nyingine zote.
Amesema: Ni kweli tumepata hasara, tumepoteza wapendwa wetu, hilo halina shaka, na hayo ndiyo matokeo ya vita vyovyote vile, lakini Jamhuri ya Kiislamu imethibitisha kwamba ni nguvu kubwa. Tumemtia adui hasara kubwa mno ya mali kuliko alivyotusababishia yeye hasara. Adui ndiye aliyeanzisha vita hivyo na ndiye aliyepata hasara kubwa zaidi.