Maelfu ya wafanyakazi wameandamana nchini Ireland kulaani kuendelea jinai za utawala wa Kizayuni wa Israel huko Palestina.
Maelfu ya wafanyakazi wa Ireland na wanachama wa chama cha wafanyakazi wameonyesha mshikamano wao na watu wa Gaza na upinzani wao dhidi ya mauaji ya halaiki na ukaliaji haramu wa ardhi za Wapalestina katika miji mbalimbali ya nchi hiyo leo.
Wafanyakazi hao waliondoka kiishara katika maeneo yao ya kazi kwa ajili ya kufanya kumbukumbu na kukusanyika mbele ya shule na ofisi za serikali wakipaza sauti kulaani jinai za Israel dhidi ya Wapalestina.
Kwa mujibu wa vyanzo vya habari vya Ireland, wafanyakazi walitoka kwenye meza na madarasa yao, wakaunda duara mbele ya jengo la ofisi zao au katika ua, wakiwa na mabango ya kuunga mkono Palestina, na kuonyesha upinzani wao wa kuendelea kwa vita na kuzingirwa kwa Ukanda wa Gaza kwa kukaa kimya, kusoma taarifa fupi, au kufanya sala na ibada za kumbukumbu.
Kongamano la Vyama vya Wafanyakazi liliwataka washiriki kurekodi picha za matukio hayo na kuzichapisha kwenye mitandao ya kijamii ili upeo wa vuguvugu hili uonekane kutoka mahali pa kazi.
Katika uwanja wa elimu, vyama vya walimu vilichukua jukumu kubwa katika harakati hii. Maelfu ya walimu na wafanyakazi katika vituo vya elimu walionyesha uungaji mkono wao kwa watu wa Palestina kwa kufanya hafla ya kukaa kimya katika uwanja wa shule na madarasa, pamoja na mikutano mifupi katika chumba cha walimu na picha za pamoja na kauli mbiu kama vile “kusitishwa kwa mapigano mara moja” na “Palestina huru.”