Katika ziara yake hii ya kwanza ya nchi za kigeni, Kiongozi huyo Mkuu wa Kanisa Katoliki Duniani alipokelewa kwa heshima zote za kiitifaki mjini Ankara na kukutana kwa mazungumzo na viongozi kadhaa wa Uturuki akiwemo rais Recep Tayyip Erdogan.
Papa Leo XIV ameeleza kuwa dunia inayumba kutokana na tamaa na kuchagua mambo yanayodidimiza haki na amani huku akitambua jukumu la Uturuki kama daraja linalounganisha Mashariki na Magharibi na kuitaka nchi hiyo kufurahia hadhi yake kama msuluhishi anayesaidia juhudi za kutafuta amani ya kudumu. Aidha Papa Leo ametoa wito kwa ulimwengu:
” Wanadamu wote kama familia, wanapaswa kwa pamoja kupambania amani, afya, elimu na kulinda uhai pamoja na kukabiliana na njaa na umaskini. Vatican, kama nguvu ya kiroho na kimaadili itashirikiana na mataifa yote yenye dhamira ya kuleta maendeleo kwa kila mtu. Tushikamane katika ukweli na urafiki, huku tukiamini msaada wa Mungu kwa unyenyekevu, ” alisema kiongozi huyo wa kidini.
Kwa upande wake Rais Erdogan ameusifu msimamo wa Papa Leo XIV kuhusu suala la Palestina akisema ana matumaini kuwa ziara hiyo ya kwanza ya Kimataifa ya Papa, itakuwa ya manufaa kwa ajili ya utu hasa wakati huu kukishuhudiwa mivutano na hali ya mashaka kote ulimwenguni.
Kabla ya kuondoka katika mji mkuu Ankara, Papa Leo alimtembelea na kufanya mazungumzo ya faragha na mkuu wa idara ya masuala ya kidini wa Uturuki, Safi Arpagus ambaye ndiye mufti wa zamani wa Istanbul. Baadaye kiongozi huyo wa kidini alielekea katika mji mkuu wa kibiashara wa Instanbul wenye wakazi wapatao milioni 16 ambako usalama uliimarishwa huku barabara kadhaa zikifungwa.
Papa Leo atahudhuria pia shughuli za kiibada kwa kuwa lengo kuu la kuizuru Uturuki ni kuadhimisha Jubilei ya Miaka 1,700 ya Mtaguso Mkuu wa Nicea, ambalo ni Baraza la kwanza la Kiekumeni katika historia ya Ukristo. Mnamo mwaka 325 baada ya Kristo, mtaguso huo ndiyo ulitunga Toleo la Kwanza la Kanuni ya Imani ya Nicea, sala ambayo mamilioni ya Wakristo bado wanaisali kila Jumapili.
Ziara ya Papa Leo XIV huko Lebanon
Katika ziara yake nchini Lebanon, Papa Leo wa XIV analenga kutimiza ahadi ya mtangulizi wake hayati Papa Francis ya kulitembelea taifa hilo ambalo idadi kubwa ya raia wake ni Waislamu huku theluthi moja tu wakiwa ni Wakristo.
Ziara ya Lebanon inatazamwa kama wito wa amani na mwanga wa matumaini katika taifa hilo lililokumbwa na migogoro kwa muda mrefu. Lebanon imekuwa na uhusiano mzuri na Vatican tangu ilipojipatia uhuru wake kutoka kwa Ufaransa mnamo mwaka 1943.
Kihistoria, Kanisa Katoliki limesaidia uanzishwaji wa taasisi nyingi nchini Lebanon ikiwa ni pamoja na shule, hospitali, vituo vya utafiti pamoja na kuimarisha uhusiano kati ya Wakristo, Waislamu na waumini wa dini nyingine nchini humo.