Katika mtandao wake wa kijamii Trump alisema atabatilidha maombi ya mamilioni ya wahamiaji yaliyoidhinishwa na utawala wa rais wa zamani Joe Biden. Hatua hii inaipa sura mpya vita vyake vinavyoendelea kushika kasi dhidi ya wahamiaji nchini humo.
“Nitasitisha kabisa hatua ya wahamiaji kutoka nchi masikini kuingia Marekani, ili mfumo uliopo upate nafuu kutokana na mzigo mkubwa wa wahamiaji.” alisema Trump katika mtandao wake wa X.
Donald Trump alisema amechukua hatua hiyo baada ya walinzi wake wawili kupigwa risasi na raia wa Afhanistan. Amesema Sarah Beckstrom, aliye na miaka 20 na mwanachama wa jeshi la taifa, waliopelekewa mjini Washington kama sehemu ya mpango wake wa kuwakamata wahalifu aliuwawa, kutokana na majeraha aliyoyapata baada ya kupigwa risasi na mhamiaji raia wa nchi hiyo ya bara Asia.
Askari mwengine aliyejeruhiwa katika shambulio hilo ni Andrew Wolfe aliye na umri wa miaka 24 ambaye anasemekana kuwa katika hali mbaya hospitalini.
Trump kuwafurusha wahamiaji wanaohatarisha usalama wa Marekani
Tayari maafisa wa ujasusi wameanzisha uchunguzi juu ya kisa hicho na tayari wamemtambua mshukiwa wa tukio hilo ambaye ni kijana wa miaka 29 Rahmanullah Lakanwal, aliyewahi kufanya kazi na kikosi cha Marekani cha “Zero Units” nchini Afghanistan, kinachoshirikiana na shirika la ujasusi la Marekani CIA katika masuala ya kupambana na ugaidi. Bado haijajulikana ni kwanini kijana huyo alitekeleza mashambulizi dhidi ya askari hao.
Trump pia alisema atasitisha usaidizi wa kifedha na ruzuku zinazotolewa, kwa raia wasiokuwa wamarekani na pia kufuta uraia wa wahamiaji, wanaotishia amani na kumrejesha nyumbani raia yoyote wa kigeni, anaehatarisha usalama wa Marekani au ambae haingiliani na kuendana na mifumo ya kimagharibi.
Wakati huo huo Joseph Edlow, Mkurugenzi wa huduma za uraia na uhamiaji nchini Marekani, amesema ametoa amri ya idara yake kupitia hadhi za uhamiaji aina ya Green Card, za kila mkaazi wa taifa hilo kutoka nchi 19 husika zilizotajwa na Trump, ikiwa ni pamoja na Cuba, Haiti, Iran, Myanmar na Afghanistan.
Kwengineko mashirika ya Umoja wa Mataifa yameendelea kuishinikiza Marekani kuridhia waomba hifadhi kuingia nchini humo kwa kufuata njia zinazohitajika. Umoja huo pia umeitaka Marekani kuheshimu mkataba wa uhamiaji uliotiwa saini mwaka 1953 unaohimiza ulinzi wa wahamiaji chini ya sheria ya kimataifa.