Marekani na Ukraine zimekuwa katika mazungumzo na jitihada za kuweza kumaliza mzozo huu wa vita kati ya Ukraine na Urusi bila mafanikio. Pande zote mbili sasa zimeashiria kuwa kuna uwezekano wa kufikia muafaka huo wiki ijayo kwa sababu sasa wana mtazamo sawa kuhusu kukomesha vita hivyo vya karibu miaka mitano sasa.
Ijapokuwa bado kuna tofauti kubwa hasa kuhusu ni nani ataendelea kulimiliki eneo kubwa la ardhi ya Ukraine ambalo kwa sasa liko chini ya Mamlaka ya Urusi.
Wakati huo Rais wa Urusi Vladmir Putin amesema rasmu ya mkataba wa kusimamisha vita baina ya mataifa hayo mawili jirani ambayo inaendelea kujadiliwa na pande mbili chini ya msaada wa Marekani inaweza kuweka msingi na mazingira bora ya kufikia makubaliano kamili siku za usoni.
Vladmir Putin ameongeza kusema kwamba hilo litawezekana tu endapo majeshi ya Ukraine yataondoka katika maeneo ambalo Urusi inadai kama maeneo yake, huku akionya kwamba endapo Ukraine haitayahama maeneo hayo Urusi haitakuwa na jinsi isipokuwa kuendelea kupigana.
Kwa upande mwingine Rais Putin ameutaja utawala wa Ukraine kama usiokubalika na kwamba muafaka wowote utakaofikiwa unapaswa kutambuliwa na jamii ya kimataifa ikiwa ni pamoja kutambuliwa kwa majimbo ya Crimea na Donbass yaliyovamiwa na kuchukuliwa na Urusi nchini Ukraine.
Hata hivyo Kyiv imeendelea na msimamo wake kwamba hakuna sehemu hata kidogo ya Ukraine itachukuliwa na Urusi.Andriy Yermak, kiongozi wa ujumbe wa Ukraine katika mazungumzo baina yake na Urusi amesema Ukraine haitakubali kusalimisha kipande cha ardhi yake kwa Urusi, amesema kwamba siku zote Rais Zelenskyy atakapokuwa madarakani hakuna tegemeo lolote la wao kuachia sehemu ya ardhi yao mikononi mwa mahasimu wao Urusi.
“Ujumbe wa Ukraine utakuwa umejiandaa vyema na kuzingatia kazi muhimu”
Rais Zelenskyy amethibitisha kwamba serikali yake pamoja na wawakilishi wa Marekani wanatazamiwa kukutana hivi karibuni na kuandaa mapendekezo kutoka mkutano wa Geneva ambayo yatapelekea kuwepo kwa mkataba wa amani huku lakini suala la usalama wa Ukraine likiendelea kuzingatiwa
“Mwishoni mwa wiki hii, wajumbe wetu, pamoja na wawakilishi wa Marekani, wataendelea kupitia vipengele tulivyokubaliana huko Geneva na kuviweka katika mfumo unaotuelekeza kwenye njia ya kupata amani ya uhakika na usalama. Kutakuwa na mkutano wa wajumbe. Ujumbe wa Ukraine utakuwa umejiandaa vyema na kuzingatia kazi muhimu”, alisema Zelensky.
Wadadisi wa kisiasa wanaamini mzozo huu huenda ukadumu kwa muda mrefu kutokana na ukinzani wa kauli zinazotolewa na viongozi wa pande mbili.
Pamoja na kwamba kunatazamiwa kufanyika mkutano wiki ijayo ili kuandaa mazingira ya mkataba wa amani lakini kuendelea kwa mwito wa Urusi kuitaka Ukraine iyahame maeneo ambayo inayataja kama yake na kupuuzia mwito huo kwa Ukraine ni suala ambalo linaufanya mkataba wowote utakaofikiwa kuwa katika hali ya wasiwasi ikiwa amani itapatikana au vita vitaendelea.