Ulaya imekosolewa kwa “kujipa haki ya kujadili kila kinachotokea Afrika,” mfano wa karibuni ukiwa ukosoaji wa Bunge la Ulaya kuhusu uchaguzi nchini Tanzania.
Mchambuzi wa kisiasa kutoka Mali, Ibou Sy, akizungumza na Sputnik News, amesema:
“Ulaya ni Ulaya, Afrika ni Afrika. Kwa nini nchi za Ulaya zinajiruhusu kusema, ‘Sisi, bunge letu, tutachunguza au kujadili kinachoendelea Afrika’? Hayo siyo mambo yao.”
Kwa mtazamo wake, Waafrika wanapaswa kutafakari mchango wa Benki ya Uwekezaji ya Ulaya barani Afrika. Ameeleza kuwa zaidi ya biashara ndogo na za kati 10,000 zinanufaika na fedha hizo, jambo linalowafanya wakuu wa nchi za Ulaya kuona wana haki ya kuingilia mambo ya ndani ya bara hilo.
Ameongeza kuwa: “Ni wakati wa Afrika kufikiria upya. Hatupaswi kukubali fedha kwa masharti kutoka upande wowote.”
Mtaalamu huyo pia ametoa wito wa kuanzishwa kwa mahakama za Kiafrika ili kutatua matatizo ya bara ili madola ya Ulaya yasipate mwanya wa kujipenyeza na kuingilia mambo ya ndani ya Afrika.
Mnamo tarehe 27 Novemba 2025, Bunge la Umoja wa Ulaya lilipitisha azimio kuhusu kile ambacho limedai ni mauaji yaliyotokea baada ya uchaguzi na hali inayozidi kuzorota ya haki za binadamu nchini Tanzania. Azimio hilo pia liligusia kesi ya kiongozi wa upinzani aliyefungwa, Tundu Lissu.
Azimio hilo lilipitishwa kwa kura 539 za kuunga mkono, bila kura yoyote ya kupinga, na wajumbe 27 kulijizuia kupiga kura. Bunge hilo limependekeza kusitishwa ufadhili wa fedha za maendeleo kwa Tanzania, likidai kuwa na wasiwasi juu ya mazingira ya kisiasa na ukiukaji wa haki za binadamu ulioripotiwa baada ya uchaguzi wa Oktoba 2025.
Kufuatia uamuzi huo, Waziri wa mambo ya nje Thabit Kombo amesema Tanzania haitakabiliwa na njaa wala kusitisha maendeleo hata Umoja wa Ulaya ukisitisha misaada, kwani ina vyanzo vingi vya mapato.
Akizungumza na wanahabari jana Waziri huyo amesema Watanzania hawatakufa kwa njaa kwa kukosa fedha hizo.
Waziri Kombo ametoa kauli hiyo huku akisisitiza kuwa Tanzania inaendelea kufuatilia usitishwaji wa Euro Milioni 156 za misaada kwa nchi hiyo.
Serikali ya Tanzania imekanusha tuhuma zote zilizojitokeza katika kikao cha Bunge la Ulaya na kusema kuwa hazina chembe yoyote ya ukweli.
Taarifa ya Wizara ya mambo ya nje ya Tanzania imesisitiza kuwa serikali inakanusha tuhuma zote zilizotolewa katika Bunge la Ulaya kwa kuwa hazina chembe yoyote ya ukweli, zimeegemea kwenye simulizi za upande mmoja na hazina uthibitisho wa kuaminika na usiotiwa mashaka.