Mbeya. Wakulima wa zao la kahawa Nyanda za Juu Kusini wameshauriwa kutumia kilimo hicho kwa malengo ya kujiinua kiuchumi na kutowaruhusu vishoka wanaonunua mazao shambani kabla ya muda wake.
Pia, wametakiwa kulima kitaalamu kwa kutotegemea mvua badala yake watumie teknolojia ya umwagiliaji ili kuzalisha kwa tija na kukabiliana na mabadiliko ya tabianchi akieleza kuwa serikali inaendelea kuweka mazingira bora kwa kutoa pembejeo za kilimo kila mwaka.
Akizungumza katika hafla ya utoaji tuzo kwa washindi wa kahawa bora nchini iliyofanyika usiku wa kuamkia leo Novemba 29 jijini hapa, Mkuu wa Wilaya ya Mbeya, Solomon Itunda amesema wakulima wanapaswa kwenda na wakati ili kuzalisha kwa tija.
Amesema kilimo cha kahawa kinategemea zaidi mvua, hivyo upo uwezekano wa zao hilo msimu huu kupungua kutokana na uhaba wa mvua, akishauri wakulima kubadilika na kutumia kilimo cha umwagiliaji.
Amesema kwa sasa siyo muda wa kulima kwa mazoea kutokana na mabadiliko ya tabianchi, hivyo ili kuwa na uhakika wa uzalishaji wa zao hilo wakulima wachimbe visima ili kuendana na wakati huu wa uhaba wa mvua.
“Tumieni kilimo kwa malengo, msiwaruhusu vishoka wanaonunua mazao shambani kwa bei ya chini, serikali imeweka mazingira rafiki kwa kutoa pembejeo za kilimo kila mwaka, tusilime kwa mazoea”
“Kilimo cha kahawa kinahitaji mvua ya kutosha, sasa mwaka huu hakuna mvua lazima tubadilike tuchimbe visima kwa ajili ya umwagiliaji tujihakikishie uzalishaji wenye tija na tulime kwa malengo kwani kahawa ni uchumi na ni biashara,” amesema Itunda.
Kwa upande wake Meneja wa Bodi ya Kahawa (TCB) Nyanda za Juu Kusini, Ezekiel Mwakyoma, amesema lengo la shindano la kahawa bora ni kutangaza zao hilo kimataifa kwa ajili ya kupata soko.
Amesema baada ya shindano hilo, kahawa iliyoshindanishwa itauzwa kwenye soko la kimataifa kwa bei ya juu tofauti na ilivyo hapa nchini na kuchochea zaidi uzalishaji wa zao hilo kwa wakulima.
“Faida ya mashindano haya ni kubwa kwa Taifa, tunalenga kutangaza zao hili na kutafuta soko, lakini itachochea uzalishaji wenye tija kwa wakulima, hii kahawa iliyoshindanishwa itauzwa kwenye soko la kimataifa,” amesema Mwakyoma.
Ameongeza kuwa matarajio ya Bodi ya Kahawa nchini (TCB) ni kuendeleza mashindano hayo akieleza kuwa baada ya kufunga kwa mwaka huu, kamati ya maandalizi itatangaza ni Mkoa gani kuwa wenyeji.
Kwa upande wake aliyekuwa jaji kitaifa wa mashindano hayo, Florah Chengula amesema jumla ya sampuli 70 wa kahawa aina ya Robusta na Arabika zilishindanishwa kuanzia ngazi ya Taifa hadi kimataifa na kuwapata washindi.
Amesema zoezi lilienda kwa haki kwakuwa hakuna jaji aliyefahamu sampuli inatoka wapi, hali ambayo iliwapa kufanya jukumu lao kwa weledi akieleza kuwa washindi watashiriki mnada wa kimataifa chini ya moja ya kampuni ya nchini Marekani.
“Tulikuwa na sampuli 70 ikiwa ni Arabika iliyogawanywa katika makundi tofauti ikiwamo Natural na Robusta yenye makundi ya Experimental, majaji walikuwa ni wa kitaifa na kimataifa na shindano halikuwa na upendeleo wowote” amesema Flora.
Mmoja wa wakulima walioshiriki hafla hiyo, Sikitu Mwambene amesema kupitia shindano hilo linawaweka karibu wakulima wote kujifunza namna bora ya kukuza kilimo na kuzalisha kwa tija.
“Inatufanya kuhamasika, lazima Nyanda za Juu Kusini tujifunze kwamba zao la Kahawa ni dhahabu kwetu, tujivunie na tuongeze tija kwa kuzingatia mabadiliko ya tabaianchi kwenye kilimo” amesema Mwambene.
Akitangaza washindi, jaji mkuu wa shindnao hilo Filip Bartelak kutoka nchini Poland amesema zoezi lilienda vizuri na washiriki waliwasilisha kahawa zilizo bora ambazo anaamini Tanzania itafanya vizuri kimataifa.
“Mshindi Natural Arabika ni Finagro Plantation, upande wa Robusta mshindi ni Juhudi Amcos, kiujumla zoezi lilienda vizuri kwa kuzingatia taratibu zote na kahawa shiriki zilikuwa bora” Amesema Bartelak.