KUWA na uhakika wa Khalid Aucho kucheza kesho dhidi ya Stellenbosch, imemfanya Kocha wa Singida Black Stars kushusha pumzi akiamini kwamba kiungo huyo na nyota wengine wazoefu kikosini hapo watafanya vizuri.
Kauli ya Gamondi imekuja wakati Singida Black Stars, itakuwa kwenye Uwanja wa New Amaan, Zanzibar kuikaribisha Stellenbosch kutoka Afrika Kusini ikiwa ni mechi ya Kundi C katika Kombe la Shirikisho Afrika itakayochezwa kesho Jumapili Novemba 30, 2025.
Hii ni mechi ya pili hatua ya makundi Singida inakwenda kucheza ikiwa na presha mbili, kwanza ikitoka kupoteza ugenini dhidi ya CR Belouizdad kule Algeria, kwa mabao 2-0, pia kupigania heshima ya nchi kwa timu zinazoshiriki mashindano hayo baada ya juzi Azam kupoteza nyumbani.
Mechi hiyo itakayoanza saa 1:00 usiku, inatarajiwa kuwa na upinzani mkubwa, huku Stellenbosch ikiingia kibabe kufuatia ushindi wa bao 1-0 ilioupata katika mechi ya kwanza nyumbani dhidi ya AS Otôho ya Congo Brazzaville.
Aucho ambaye alikosekana katika mechi ya kwanza dhidi ya CR Belouizdad kutokana na kukosa visa ya kuingilia Algeria, kesho anatarajiwa kuongoza safu ya kiungo kusaka pointi za kwanza hatua ya makundi.
Uwepo wa Aucho kutaifanya Singida kutulia katika eneo la kiungo ambapo tangu imetua hapa kisiwani Zanzibar amekuwa akifanya mazoezi ya kuongeza nguvu ya kushambulia.
Kocha wa Singida Black Stars, Miguel Gamondi na wasaidizi wake wamekuwa na hesabu kali, huku wakifanya vikao tofauti vya kuelekezana na viungo pamoja na washambuliaji ili wawe tayari kwa mechi hiyo.
“Aucho ni mchezaji ambaye atakuwapo kwenye mchezo wa kesho, ni ngumu kusema hatakuwapo kwani ana uzoefu mkubwa na ni mchezaji mkubwa.
“Uwepo wa wachezaji kama Aucho na wengine wenye uzoefu unaongeza upana wa timu kufanya vizuri, kwa hiyo tutegemee makubwa kwa sababu wamefanya mazoezi ya kutosha,” amesema Gamondi.
Singida ili ipate ushindi, itategemea ubora wa washambuliaji wake Elvis Rupia na Horso Mwaku, wakati nyuma yao viungo Clatous Chama, Marouf Tchakei, Idriss Diomande na Emmanuel Keyekeh wakiwa wanatoa nafasi kwa benchi la ufundi kuchagua nani aanze.
Stellenbosch nayo sio timu ya kubeza kwani imetoka kucheza nusu fainali ya michuano hii msimu uliopita, ikitolewa na Simba baada ya kufungwa bao 1-0 uwanjani hapo, kisha kule kwao Sauzi ikawa 0-0.
Kocha wa Stellenbosch Steve Barker, bado ameendelea kutengeneza kikosi kinachokuwa na kasi wakati timu inatafuta bao huku wakiwa na nidhamu kubwa eneo la ulinzi. Jambo kubwa ni kwamba, hawakati tamaa kiasi cha kuwapa ushindi mechi ya kwanza dhidi ya AS Otoho walipofunga katika dakika ya 90+3 kupitia Ashley Cupido.
WASAUZI WA KUCHUNGWA
Mabeki wa Singida watalazimika kuwa makini na washambuliaji wa Stellenbosch, Muzomuhle Khanyi na Ashley Cupido ambaye ndiye aliyefunga bao lililowapa ushindi mbele ya Otoho.
Singida itatakiwa kumdhibiti beki wa kulia Mnigeria Enyinnaya Godswill ambaye ana kasi ya kupandisha mashambulizi kwa wapinzani.
Godswill aliwahi kucheza na Morrice Chukwu wa Singida Black Stars, katika klabu ya Rivers United ya Nigeria, hivyo wanafahamiana vizuri.
SIKIA TAMBO
Gamondi akizungumzia mechi hii, amesema: “Kuwa na presha ni suala la hofu kwa wale ambao ni wageni kwenye hii michuano, licha ya kwamba tunawaheshimu sana wapinzani wetu, lakini tumejipanga kushinda.
“Kuwa nyumbani ni suala la kwanza na kupata matokeo mazuri ni suala jingine, kikosi kipo tayari kimbinu, tutakwenda kutumia nafasi zote tutakazopata.
“Namfahamu kocha wa wapinzani na ananifahamu, hivyo mechi itakuwa ya kimbinu kwelikweli, tutacheza kikubwa kwa kutengeneza nafasi na kuzitumia,” amesema Gamondi ambaye msimu wa 2023-2024 aliifikisha Yanga robo fainali ya Ligi ya Mabingwa Afrika akiwa kocha wa kikosi hicho kabla ya 2024-2025 kuifikisha makundi, lakini akaondolewa kabla ya mechi za hatua hiyo hazijaanza kuchezwa.
Kwa upande wa Barker, amesema: “Huu sio uwanja mgeni kwetu, hivyo tutakwenda kucheza kwa ari kubwa, kikubwa kwetu ni alama tatu, malengo yetu ni kumaliza hatua ya makundi katika nafasi nzuri.
“Naamini sisi na wapinzani wetu wote tunazitaka pointi tatu, hata mchezo uliopita ulikuwa mgumu sana ndio maana unaona tumepata bao mwishoni kabisa mwa mchezo.
“Bado tunahitaji nguvu kubwa kuwafunga Singida kwani sio timu ndogo, licha ya kwamba msimu uliopita tulishiriki michuano hii na kufika tulipofika, lakini uzoefu wetu hauna nguvu kama wao kuwa nyumbani,” amesema.
Naye mshambuliaji wa Stellenbosch, raia wa New Zealand, Andre de Jong, amesema: “Tumerudi kwenye uwanja ambao tuliuchezea msimu uliopita, kwetu ni furaha kwa sababu tunakuwa sio wageni sana.
“Tunajua presha ya mashabiki na uwanja, hiyo inatosha na ukizingatia wapinzani wetu wako nyumbani, hivyo mchezo utakuwa mgumu, lakini sisi kama wachezaji tuko tayari.”