Katibu Mkuu wa Harakati ya Muqawama wa Kiislamu ya nchini Lebanon ya Hizbullah amesema, harakati hiyo ina haki ya kutoa jibu kwa shambulio la kigaidi lililofanywa na utawala wa kizayuni wa Israel lililomuua Kamanda wake mwandamizi Haytham Ali Tabatabai, na akaongeza kuwa Hizbullah yenyewe itaamua wakati na mahali pa kutolea jibu hilo.
Sheikh Naim Qassem ameyasema hayo alipohutubia hafla ya kumbukumbu ya kumuenzi Shahidi Tabtabai, na kusisitiza kwamba shambulio la hivi karibuni lililofanywa na Israel halitaachwa bila ya jibu, na kubainisha pia kuwa ni Hizbullah ndiyo itakayoamua lini na wapi pa kutekelezea operesheni hiyo ya kulipiza kisasi.
Haitham Tabatabai, ambaye ni afisa wa juu zaidi wa kijeshi wa Hizbullah na mmoja wa wanachama waanzilishi wa harakati hiyo ya Muqawama wa Kiislamu, aliuawa shahidi katika shambulio la anga lililofanywa na jeshi la utawala wa kizayuni siku ya Jumapili iliyopita kwenye vitongoji vya kusini mwa mji mkuu wa Lebanon, Beirut.
Sheikh Qassem amesema, utawala wa Kizayuni unaendelea kukiuka mamlaka ya kujitawala ya Lebanon, na vikosi vya jeshi la utawala huo ghasibu vinaendesha shughuli zake bila wasiwasi ndani ya maeneo ya ardhi ya Lebanon kwa sababu vyombo vya intelijensia vya ukanda huu na vya Marekani vinavipatia taarifa za kutekelezea operesheni zake.
“Lengo la mauaji hayo halijafikiwa na halitafikiwa, na tutaendelea kufuata njia hiyo hiyo,” amesisitiza Sheikh Qassem.
Katibu Mkuu wa Hizbullah amebainisha kuwa “lengo la mauaji ya shakhsia mashuhuri zaidi katika ufufuaji wa uwezo na nguvu za kijeshi lilikuwa ni kudhoofisha ari na kusababisha mkanganyiko.”
Sheikh Naim Qassem, ameyaelezea makubaliano ya kusitisha vita, ambayo yalianza kutekelezwa Novemba 27, 2024, kuwa ni ushindi kwa Hizbullah, na akaongeza kuwa Israel ilishindwa kufikia lengo lake la kuiangamiza harakati hiyo ya Muqawama na ikalazimika kukubali makubaliano ya suluhu baada ya kupata hasara kubwa kwenye uwanja wa vita.
Katika sehemu nyingine ya hotuba yake, Sheikh Qassem amesisitiza kuwa, serikali ya Beirut ina jukumu la kuhakikisha vikosi vya jeshi la utawala wa kizayuni vinaondoka kikamilifu na askari wa jeshi la Lebanon wanapelekwa kusini mwa nchi hiyo.
Aidha, ametanabahisha kwa kusema: “vitendo vya uchokozi vinavyoendelea kufanywa na Israel vinailenga Lebanon nzima. Havielekezwi kwa Hizbullah pekee”…/