Leo ni Jumamosi mwezi 8 Mfunguo Tisa Jamadithani 1447 Hijria ambayo inasadifiana na 29 Novemba 2025 Miladia.
Miaka 82 iliyopita sawa na tarehe 29 Novemba 1943 harakati ya Ukombozi ya kupambana na ufashisti iliundwa nchini Yugoslavia chini ya uongozi wa Marshal Tito.
Wapiganaji wa harakati hiyo walitoa pigo kubwa kwa wanajeshi wa Ujerumani wakati Yugoslavia ilipokuwa ikikaliwa kwa mabavu na jeshi la Ujerumani.
Mwaka 1944 wapiganaji wa harakati ya kupambana na ufashisti nchini Yugoslavia waliwafukuza nchini mwao wanajeshi vamizi wa Ujerumani kwa kusaidiwa na Jeshi Jekundu la Urusi ya zamani.
Siku kama ya leo miaka 78 iliyopita mwafaka na tarehe 29 Novemba 1947, Baraza Kuu la Umoja wa Mataifa lilipasisha kwa wingi hafifu wa kura suala la kugawanywa ardhi za Palestina baina ya serikali mbili yaani ya Palestina na ya Kiyahudi.
Uamuzi huo usio wa kiadilifu na usio wa kimantiki ulichukuliwa chini ya ushawishi wa serikali za Magharibi hususan Marekani na Uingereza. Siku hii imepewa jina la Siku ya Kimataifa ya Mshikamano na Wapalestina.
Siku kama ya leo miaka 70 iliyopita, alifariki dunia Ayatullah Sayyid Abdul Hussein Sharafuddin A’mili, alimu na msomi mkubwa wa Kiislamu.
Ayatullah Sharafuddin alizaliwa mwaka 1290 Hijria huko Kadhimain moja kati ya miji ya Iraq. Alielekea Jabal A’mil nchini Lebanon baada ya kuhitimu masomo yake na kuanza kujishughulisha na harakati za Kiislamu. Msomi huyo mkubwa ametoa huduma za thamani kubwa kwa Ulimwengu wa Kiislamu na daima alikuwa akisisitiza suala la umoja baina ya Waislamu.
Ayatullah Sayyid Abdul Hussein Sharafuddin ameandika vitabu na risala nyingi ili kufikiwa lengo hilo.
Miaka 31 iliyopita katika siku kama ya leo, inayosadifiana na tarehe 8 Azar mwaka 1373 alifariki dunia Ayatullah Muhammad Ali Araki, mmoja wa marjaa wakubwa wa taqlidi wa Waislamu akiwa na umri wa miaka 103.
Mwanzuoni huyo wa Kiislamu alizaliwa katika mji wa Arak katikati mwa Iran na tangu akiwa na umri mdogo alikuwa na shauku kubwa ya kujifunza elimu ya dini.
Ayatullah Muhammad Ali Araki kwa muda mrefu alifundisha katika chuo kikuu cha kidini cha Qum na miongoni mwa vitabu vyake ni risala ya Ijitihadi na Taqlidi pamoja na Sherhe ya Uruwatul Uthqaa.
Katika siku kama ya leo miaka 28 iliyopita, Timu ya Taifa ya mpira wa miguu ya Iran ilipata ushindi dhidi ya Australia katika mchezo uliokuwa na msisimko wa aina yake na hivyo kujikatia tiketi ya kushiriki mashindano ya soka ya Kombe la Dunia baada ya miaka ishirini.
Kufuzu kwa Timu ya Taifa ya mpira wa miguu ya Iran kwenda Kombe la Dunia la 1998 Ufaransa kuliacha kumbukumbu nyingi katika akili za Wairani, kiasi kwamba baada ya kupita karibu miongo mitatu sasa wapenzi wa mpira wa miguu bado wanafurahia na kupitia kumbukumbu za siku hizo.
Ushindi dhidi ya Australia na kupata tiketi ya kucheza Kombe la Dunia kulikokuwa na hamasa, na kuwa katika kundi moja na timu za taifa za Ujerumani, Marekani na Yugoslavia kuliongezea nguvu zaidi kumbukumbu za mashindano ya Kombe la Dunia huko Ufaransa.
Siku kama ya leo 15 iliyopita sawa na tarehe 8 mwezi Azar mwaka 1389 Hijria Shamsia, Madakta Majid Shahriyari na Fereydun Abbasi waliokuwa Wahadhiri wa Fizikia ya Nyuklia wa Iran walilengwa katika mashambulio mawili tofauti ya kigaidi mjini Tehran.
Dakta Abbasi alijeruhiwa ambapo Dakta Majid Shahriyari Mhadhiri wa Chuo Kikuu, Mwanafizikia na Msomi wa Nyuklia wa Iran akauawa shahidi katika shambulio hilo.
Magaidi waliofanya jinai hiyo walitiwa nguvuni na kukiri kwamba wanashirikiana na shirika la ujasusi la Israel MOSSAD.
