Hatua ya Mamlaka ya Ndani ya Palestina ya kuzidisha kasi ya kuwatia mbaroni watu kwa malengo ya kisiasa katika Ukingo wa Magharibi wa Mto Jordan imekabiliwa na upinzani na wasiwasi wa Wapalestina kuhusiana na matokeo mabaya ya hatua hiyo.
Katika siku za karibuni, Mamlaka ya Ndani ya Palestina imezidisha kuwatia mbaroni wanaharakati, wanafunzi na hata wafungwa walioachiwa huru katika Ukingo wa Magharibi na huko al Khalil. Mamlaka ya Ndani ya Palestina imechukua hatua hii huku mashambulizi na jinai za utawala wa Kizayuni wa Israel dhidi ya Wapalestina zikiendelea.
Katika mazingira haya, swali linaloulizwa ni kuwa, kwa nini Mamlaka ya Ndani ya Palestina inaelekea katika mkondo huo?
Inaonekana kuwa mojawapo ya sababu kuu zilizoifanya Mamlaka ya Ndani ya Palestina kuchukua hatua hiyo ni ushirikiano wake wa kiusalama na utawala wa Kizayuni. Ushirikiano wa kiusalama kati ya Mamlaka ya Ndani ya Palestina na utawala wa Israel umekuwepo kwa miaka mingi na umeongezeka kwa sasa. Ripoti zinaonyesha kuwa Mamlaka ya Ndani ya Palestina, kwa kushirikiana na utawala wa Israel, imewatia nguvuni wanaharakati, wanafunzi na hata wafungwa waliokuwa wameachiwa huru. Sera hii ni sehemu ya ushirikiano wa kiusalama wa pande mbili ili kuyadhibiti makundi ya Muqawama katika Ukingo wa Magharibi.
Sababu nyingine ya Mamlaka ya Ndani kuchukua hatua hiyo ni kwamba mamlaka hiyo inajaribu kudumisha utawala wake wa kisiasa dhidi ya makundi ya Muqawama na harakati za kisiasa za Palestina kupitia njia ya kuwatia mbaroni watu kwa malengo ya kisiasa. Baadhi ya wachambuzi wa mambo wa Palestina wanaamini kuwa kuwalenga wanafunzi na wanaharakati wa kisiasa, hasa katika miji kama Al Khalil, ni juhudi za kuzuia ushawishi wa harakati za Hamas na Jihad Islami katika Ukingo wa Magharibi.
Sababu ya tatu katika uwanja huu inahusiana na mashinikizo kutoka nje. Baadhi ya wachambuzi wa mambo wameitaja hatua hii kuwa ni matokeo ya mashinikizo ya Marekani na Israel ili kuzuia Intifadha mpya au kuenea mapambano na Muqawama. Kwa msingi huo makundi ya mapambano ya ukombozi wa Palestina kama Hamas na wanaharakati wa kisiasa wanaamini kuwa hatua hii iliyochukuliwa na Mamlaka ya Ndani ya Palestina inakwenda sambamba na malengo ya Wazayuni maghasibu na ambayo ni sawa na kuuchoma kisu mgongoni mradi wa kukomboa Palestina.
Kamatakama hiyo inayofanywa na Mamlaka ya Ndani ya Palestina kwa malengo ya kisiasa huko katika Ukingo wa Magharibi wa Mto Jordan imekabiliwa na mjibizo wa Wapalestina. Harakati ya Hamas imetaja kitendo cha askari usalama wa Mamlaka ya Ndani ya Palestina kuwatia mbaroni wanamapambano wa Kipalestina kuwa ni “ukiukaji hatari” wa haki na “pigo kwa muundo wa kitaifa” na imetaka kusitishwa mara moja kwa vitendo hivyo. Wanaharakati katika mji wa al Khalil pia wametaja kamatakamata hiyo kuwa ni sawa na “kusaliti mapambano ya ukombozi” na jaribio la kuzima mwamko wa kisiasa na mapambano ya wananchi. Makundi ya Muqawama ya Palestina pia yamezitaja hatua zote hizi kuwa zinaonyesha namna Israel na Mamlaka ya Ndani ya Palestina zinavyoshirikiana kikamilifu kwa lengo la kusaliti malengo ya Palestina. Ushirikiano kati ya Mamlaka ya Ndani ya Palestina na utawala wa Kizayuni hautakuwa na natija nyingine ghairi ya kusababisha matokeo hasi kwa Wapalestina.
Aidha ushirikiano huu utazidisha mgawanyiko wa ndani kati ya Wapalestina. Wakati huo huo, kamatakamata hii ya kisiasa inayofanywa na Mamlaka ya Ndani ya Palestina si tu haiimarishi usalama wa ndani ya Palestina wala udhibiti wake wa kisiasa bali itazidisha mgogoro wa uhalali wa serikali hiyo ya ndani na kuzidisha mgawanyiko miongoni mwa Wapalestina. Hili pia ni kati ya malengo muhimu ya utawala wa Kizayuni mkabala wa Palestina.
Ni wazi kuwa utawala wa Kizayuni Utawala wa Israel hauvumilii na haupendi kushuhudia aina yoyote ya umoja au maafikiano baina ya Wapalestina; na hauoni kuwa umoja huo unaendana na maslahi yake. Kadhalika, moja ya taathira muhimu zaidi ya hatua hii ya Mamlaka ya Ndani ya Palestina ni kwamba, utawala wa Kizayuni utazidisha mashambulizi dhidi ya Wapalestina ikiwa ni pamoja na eneo la Ukingo wa Magharibi wa Mto Jordan.