Moshi. Zikiwa zimesalia siku chache kabla ya kuingia katika shamrashamra za sikukuu za mwisho wa mwaka, wadau wa utalii mkoani Kilimanjaro wamebuni mbinu mpya ya kuvutia wageni wanaoingia mkoani humo kwa kuandaa maonyesho ya magari ya zamani katika mji wa Moshi.
Katika maonyesho hayo, zaidi ya magari 300 yanayokadiriwa kuwa ya miaka 1960 hadi 1990 yanatarajiwa kupamba mitaa ya mji wa Moshi, hatua inayolenga kuongeza vivutio vya utalii na kuupa mji sura ya kipekee wakati wa sikukuu hizo.
Uzinduzi wa tamasha hilo lijulikanalo kama Kilimanjaro Classic Car Show and Adventurer Trip 2025, umefanyika leo Novemba 29 katika viwanja vya Posta, Manispaa ya Moshi.
Akizungumzia maonyesho hayo, Katibu Tawala wa Mkoa wa Kilimanjaro, Kiseo Nzowa amesema tamasha hilo litawapa wageni na wakazi fursa ya kujionea magari ya zamani yaliyohifadhiwa kwa zaidi ya miaka 60 na bado yanafanya kazi.
“Kuwepo kwa tamasha hili kutasaidia kutangaza Mkoa wa Kilimanjaro ndani na nje ya nchi, kwani tunategemea watu wengi kujitokeza kushuhudia magari haya ya kipekee, ambayo bado yako katika hali nzuri,” amesema Nzowa.
Ameongeza kuwa magari hayo yatakuwa kivutio kikubwa cha utalii, hasa kwa vijana ambao hawajawahi kuyaona.
“Kizazi cha sasa hakijawahi kuona magari haya ya muundo wa zamani, kupitia tamasha hili, watu watapata burudani na nafasi ya kuona historia ilipotoka,” amesema nzowa
Aidha, Nzowa amesema maonyesho ya magari ya miaka ya 1960 hadi 1990 yatasaidia kupunguza msongo wa mawazo na kuwapa wananchi burudani katika kipindi hicho cha sikukuu.
Ametoa pongezi kwa wakazi wa mkoa huo kwa kuyaendeleza na kuyatunza magari hayo kwa muda mrefu, huku akitoa wito kwa wananchi kujitokeza kwa wingi katika viwanja vya Mashujaa kuanzia Desemba 28 hadi 30.
“Huu ni mwezi wa shamrashamra, si mwezi wa kukaa kimya. Ni wakati wa watu kujiachia na kufurahi,” amesema Nzowa
Naye, Mkurugenzi wa shirika la African Sports Agency, Joseph Mselle, amesema mpaka jana mataifa matano yameshajisajili kwa ajili ya kushuhudia tamasha hilo.
“Tamasha hili liinalenga kuendeleza utalii wa maonyesho ya magari ya zamani katika mkoa wetu, kama kivutio kingine cha utalii, ukifanya utafiti katika mikoa mingi ya Tanzania, Mkoa wa Kilimanjaro ni moja ya mikoa ambayo ina magari mengi ya zamani,” amesema Mselle.
Amesema, “Desemba ni kipindi ambacho Wanakilimanjaro wengi wanakuja nyumbani, hivyo tumeona tuunganishe hija hii na shughuli ambazo zinaweza kuupatia kipato mkoa wetu.”
Aidha, amesema hadi kufikia jana washiriki kutoka nchi za Kenya, Uganda, Rwanda, Afrika kusini na Botswana walikuwa wameshaonyesha nia ya kutaka kushiriki kwenye shughuli hiyo.
Kwa upande wake, Mkuu wa Wilaya ya Moshi, Godfrey Mnzava, amewataka watu wote, ikiwemo mahujaji wanaoingia mjini Moshi kwa ajili ya sikukuu hizo, kushiriki maonyesho hayo kama sehemu ya utalii.
“Kutakuwa na fursa za kiuchumi na elimu kuhusu utunzaji wa magari. Tunawaomba watu wajitokeze kwa wingi,” amesema Mnzava.
Mmoja wa washiriki wa hafla ya ufunguzi, Izack Ara, amesema tamasha hilo litakumbusha jamii umuhimu wa kutunza vitu vya kale na kuhifadhi historia.
“Watu wataona kwamba vitu vya zamani vinaweza kutunzwa na kuwa kumbukumbu muhimu. Vijana wengi wanajua tu magari ya kisasa, hivyo maonyesho haya yatawapa fursa ya kujifunza mengi,” amesema.