Dar es Salaam. Wakulima zaidi ya 10,000 kutoka vijiji vinne vya wikaya ya Kilwa wanatarajiwa kunufaika na soko la uhakika baada wa mradi wa kilimo wenye zaidi ya thamani ya Sh1.57 trilioni kuanza utekelezaji.
Mradi huo unakwenda kutekelezwa baada ya mwekezaji Pan Tanzania Agriculture Developments Ltd. ambayo kukabidhiwa hati ya ardhi isiyoasili ili aweze kufanya kilimo katika mashamba yaliyopo katika vijiji vya Mavuji, Migeregere, Nainokwe na Liwiti, Wilaya ya Kilwa Mkoa wa Lindi.
Maeneo hayo ni yale yaliyotengwa kwa
ajili ya utekelezaji wa mradi wa kilimo na maendeleo ya viwanda.
Akizungumza katika hafla hiyo, Waziri wa Mipango na Uwekezaji, Profesa Kitila Mkumbo amesema eneo analopewa mwekezaji lina ukubwa zaidi ya ekari 62,000.
“Ni mradi wenye manufaa mapana ambayo yanajumuisha ajira zaidi ya 300,000 katika kipindi cha miaka 10, Ushirikishwaji wa wakulima zaidi ya 10,000 kama wakulima washirika, uanzishaji wa viwanda zaidi ya 80 kupitia ekari 2,000 za eneo maalum la mauzo ya nje (EPZ),” amesema.
Pia mradi huo utahusisha matumizi ya teknologia za kisasa zaidi katika sekta ya kilimo, uanzishaji wa masoko mapya nje ya nchi ya zao la mhogo, uboreshaji wa huduma za kijamii kupitia kupitia programu za CSR.
Akifafanua zaidi manufaa ya mradi huo, Profesa Mkumbo amesema utahusisha kilimo cha Mihogo na mazao mengineyo sambamba na ujenzi wa kongani za viwanda 150.
Hii itafanya sasa Tanzania kuwa mzalishaji na muuzaji si wa bidhaa ghafi bali zilizoongezewa thamani jambo ambali litaongeza mauzo bidjaa za Tanzania katika masoko ya nje.
Amesema kwa sasa zitaanza kazi za msingi itakayohusisha ujenzi wa barabara hususan barabara kuu ya urefu wa kilomita 29.44 inayounganisha maeneo yote manne ya mradi.
Katika kijiji cha Mavuji, kutakuwa na majengo ya utawala, maeneo ya malazi, kituo cha utafiti wa mbegu, taasisi za mafunzo na maghala. Kijiji hiki kitakuwa na bustani kuu ya viwanda ambayo itaanza kutekelezwa na kupanuliwa hatua kwa hatua kuanzia mwaka 2028.
Katika eneo la Migeregere, kutakuwa na usafishaji wa ardhi na miundombinu,
kisha kuanzisha mifumo ya kisasa ya usimamizi wa mashamba kwa awamu.
“Kufikia mwaka 2030, eneo hili litakuwa na mfumo wa umwagiliaji wa kisasa
na kilimo cha kibiashara na katika eneo la Nainokwe, kutakuwa na mashamba yanayosimamiwa kwa
teknolojia ya hali ya juu, pamoja na matengenezo na maboresho ya mara
kwa mara hadi mwaka 2035,” amesema Profesa Kitila.
Amesema katika vijiji vyote, mradi huu utakuwa miundombinu ya kisasa, mawasiliano
ya mtandao, mifumo ya umwagiliaji wa kisasa, na vituo vya usindikaji vya
viwango vya juu.
“Mpango huu utaongeza uzalishaji wa kilimo, ajira na kuiweka Tanzania katika nafasi ya uongozi wa kikanda katika teknolojia ya
kilimo na usindikaji wa mazao. Tumejizatiti kushirikiana kwa karibu na Wizara ya Ardhi, Mamlaka ya TISEZA, na taasisi zote za kisheria kuhakikisha utekelezaji wenye uwazi, athari chanya, na uendelevu,” amesema.
Amesema dhamira hiyo ni muhimu kwa ajili ya usalama wa chakula, uwezeshaji wa kiuchumi na mustakabali wa kilimo cha Tanzania.
Mradi huu umesajiliwa chini ya Sheria ya Uwekezaji na Maeneo Maalum ya Kiuchumi ambayo inabainisha kuwa, Maeneo maalumu ya kiuchumi yanaweza kuanzishwa katika sehemu mbalimbali kwa ajili ya kuvutia
uwekezaji katika shughuli za kipaumbele za kiuchumi.
Malengo ya uanzishwaji wa maeneo maalumu ya kiuchumi ni kuongeza tija katika uwekezaji, ushindani, ukuaji wa uchumi, uhamasishaji wa mauzo ya nje na uzalishaji wa ajira kwa Watanzania.
“Hivyo mradi huu unaleta mapinduzi ya aina ya miradi inayosajiliwa katika maeneo maalum ya kiuchumi kutoka viwanda vya uzalishaji pekee na kuingia katika kilimo na uongezaji wa thamani kwa kufungamanisha,”
Mkuu wa wilaya ya Kilwa, Mohammed Nyundo amesema watu wa Lindi wanao utayari mkubwa kupokea mradi huo na mpaka jana ratiba ya zoezi hilo ilipaswa kufanyika Kilwa.
Licha ya mabadiliko ya ratiba na mkutano huo kuhamishiwa Dar es Salaam viongozi wote wa ngazi za mkoa na vijiji vinavyofikiwa na mradi huo waliweza kufika.
“Nichukue nafasi hii kuwaita wawekezaji wengine, tuna eneo kubwa linaloweza kutumika katika kilimo, tuna madini ya kimkakati ambayo yanaweza kuchimbwa,” amesema.
Mwenyekiti wa Kijiji cha Mavuji, Yusuph Mohammed amesema akiwa kama mwakilishi wa wananchi amesema ajira ni kilio kikubwa kwa wananchi wa eneo lake huku akiamini mradi huo utajibu kiu hiyo.
“Tunaomba mradi huu uanze kweli maana Kilwa tunadanganywa kwa muda mrefu, miradi mingi inakuja lakini utekelezaji haupo, tunaomba Waziri usaidie na uweke nguvh ya kuwahimiza wafanyaie kazi ili mradi utekelezwe,” amesema.
Mwenyekiti wa kijiji cha Liwiti, Samil Shamti amesema wako tayari kushirikiana na kuhakikisha mradi huo unatekelezwa na kusimamiwa kikamilifu.
“Tunaomba mradi huu uwe wa kweli na utekelezwe, ufanyike ili uwe wenye maslahi kwa wananchi na Taifa kwa ujumla,” amesema Shamti.
Akiwatoa hofu ya kutotekelezwa kwa mradi, Mkurugenzi wa Tiseza, Gilead Teri amesema ikiwa mwekezaji hatotekeleza mradi ardhi inaweza kurudishwa serikalini na kupewa mwekezaji wengine.
“Kutakuwa na mkataba maalumu ambao tutasaini, pindi atakaposhindwa kutekeleza mradi wake kwa wakati ardhi itachukuliwa na kurudishwa serikalini, hivyo nitoe wito kwa mamlaka zote zinazohusika washirikiane naye ili kuhakikisha mradi huu unatekelezwa,” amesema Teri.
Akizungumza mwekezaji wa mradi huo, Dior Feng amesema Serikali ya Tanzania imepiga hatua kubwa kwani siyo tu iko wazi kwa biashara, bali pia inachukua hatua za kuhimiza uwekezaji mkubwa na wa maana.
“Niwahakikishie kuwa tunaanza mara moja uwekezaji wetu wa miaka 10 wenye thamani ya dola milioni 640,” amesema Feng.
Amesema Pan Tanzania itatumia teknolojia za kisasa zaidi za kilimo na mifumo ya usimamizi wa mashamba yenye akili, ikiwemo umwagiliaji wa kisasa katika zaidi ya ekari 50,000 ifikapo 2030, ikiweka Tanzania kama kiongozi wa kikanda katika teknolojia ya kilimo na usindikaji wa kilimo.
Pia itatumia teknlojia GPS, ndege zisizokuwa na rubani na vitambuzi vya LOT kwa upandaji, umwagiliaji na mbolea kulingana na data utatumika.
“Pia tutafanya Uwezeshaji wa Wakulima Wadogo kwani Mradi unajitolea kuingia mkataba na kutoa mafunzo kwa zaidi ya wakulima wadogo 10,000 na kuwajumuisha katika mnyororo wa thamani na kuwapatia vyanzo endelevu vya kipato,” amesema.