Mashirika zaidi ya ndege duniani kote yametangaza leo kufuta au kuchelewesha safari za ndege, kufuatia tahadhari ya kampuni ya Airbus kwamba ndege zipatazo 6,000 chapa A320 zinaweza kuhitaji uboreshaji. Airbus iliwaagiza wateja wake siku ya Ijumaa kuchukua hatua za tahadhari za mara moja, baada ya kutathmini hitilafu ya kiufundi kwenye ndege ya JetBlue mnamo mwezi Oktoba.
Taarifa ya kampuni hiyo ilisema mionzi mikali ya jua inaweza kuharibu data muhimu kwa utendaji kazi wa vithibiti vinavyoongoza ndege, ikiongeza kuwa idadi kubwa ya ndege chapa A320 zinazofanya kazi kwa sasa zinaweza kuathirika.
Shirika la ndege la Ufaransa Air France limefuta safari 35 huku shirika la Colombia la Avianca likisema asilimia 70 ya ndege zake zimeathirika na hitilafu hiyo ya kiufundi katika programu ya mtengenezaji wa ndege wa Ulaya.