Dar es Salaam. Waziri wa Mambo ya Ndani, George Simbachawene amesema Serikali haina mpango wa kutoa uraia kwa wakimbizi waliopo kwenye kambi mbalimbali nchini.
Pia, amewataka wakimbizi wa Burundi walio nchini kuwa tayari kurejea katika Taifa lao kwa sababu kuna hali ya amani na utulivu.
Taarifa iliyotolewa kwa vyombo vya habari na wizara hiyo, imesema Simbachawene ameeleza hayo leo Jumamosi Novemba 29, 2025 kwenye mkutano wa 26 wa Pande Tatu baina ya Tanzania, Burundi na Shirika la Umoja wa Mataifa la Kuhudumia Wakimbizi Duniani (UNHCR) uliohusu urejeshaji wakimbizi nchini Burundi.
“Wakimbizi walioko kambini wasidhani kuendelea kuishi Tanzania kwa muda mrefu watapatiwa uraia, niseme wazi hatuna mpango huo,” amesema na kuongeza:
“Iwekwe kwenye kumbukumbu sahihi, Tanzania haina mpango wa kubadilisha sera na sheria zake ili kuwajumuisha wakimbizi kwenye mipango ya maendeleo ya Taifa ili kujiimarisha na kujitegemea wakiwa hapa nchini, pia hatuna mpango wa kuzigeuza kambi za wakimbizi kuwa makazi.”
Mkurugenzi wa Urejeaji na Ujumuishaji wa Warejeaji, Nestor Bimenyimana amesema Burundi ipo tayari kutoa ushirikiano ili kuwapokea wananchi wake wanaoishi Tanzania.
Mwakilishi wa UNHCR, Barbara Dotse amesema shirika hilo lina nia ya dhati ya kufanya kazi pamoja na wadau wote kwa kuandaa njia sahihi ya kuwezesha urejeaji wa wakimbizi kwa kuzingatia utu na haki zao.
Mkutano huo uliofanyika jijini Dar es Salaam umehudhuriwa na wakuu wa mikoa mitatu, akiwemo Simon Sirro (Kigoma), Mwanamvua Mrindoko (Katavi) na Paul Chacha (Tabora). Mikoa hiyo ina hifadhi wakimbizi nchini.