Guterres amesema kuwa maelfu ya Wapalestina wameuawa katika mzozo huo takribani theluthi moja wakiwa watoto na wengi zaidi wamejeruhiwa. Anaonya kuwa Gaza sasa inakabiliwa na janga la njaa, magonjwa, msongo wa mawazo, pamoja na uharibifu mkubwa wa miundombinu muhimu. “Shule, nyumba na hospitali ziko katika magofu,” anasema.
Katibu Mkuu pia anazungumzia ukiukaji unaoendelea katika Ukingo wa Magharibi, ikiwemo Jerusalem Mashariki, akirejea operesheni za kijeshi za Israel, vurugu za walowezi, upanuzi wa makazi, kufukuzwa kwa nguvu, ubomoaji wa nyumba na “vitisho vya kuongeza maeneo ya uvamizi.”
Guterres anaeleza masikitiko yake juu ya idadi kubwa ya wahudumu wa kibinadamu waliouawa katika vita hivyo, akisema wengi wao walikuwa wafanyakazi wa Umoja wa Mataifa wa Kipalestina tukio lililoashiria hasara kubwa zaidi ya wafanyakazi katika historia ya Umoja wa Mataifa. Waandishi wa habari pia waliuawa kwa idadi kubwa zaidi kuliko katika mzozo wowote tangu Vita Viuu Vya Pili Vya Dunia.
Ameonya kuwa mgogoro huo umejaribu kwa kiwango kikubwa kanuni na sheria za kimataifa zinazoiweka dunia pamoja. “Mauaji ya raia wengi, kuwahamisha watu wote mara kwa mara, na kuzuia misaada ya kibinadamu hakupaswi kukubalika katika mazingira yoyote,” alisema.
Katibu Mkuu ameelezea usitishaji mapigano wa hivi karibuni kama “mwanga wa matumaini,” akisisitiza kwamba pande zote lazima zauheshimu kikamilifu na kufanya kazi kwa nia njema kuelekea suluhu zinazozingatia sheria za kimataifa. Ametaka pia miili ya mateka wa mashambulizi ya 7 Oktoba kurejeshwa kwa familia zao nchini Israel kwa njia ya haraka na yenye heshima.
Guterres amesisitiza kwamba misaada ya kibinadamu inayookoa maisha lazima iruhusiwe kuingia Gaza kwa kiwango kikubwa, na akathibitisha tena umuhimu wa kuendelea kuiunga mkono shirika la Umoja wa Mataifa la Kusaidia wakimbizi wa Kipalestina, UNRWA, akiiita “mkombozi usioweza kubadilishwa” kwa mamilioni ya Wapalestina, wakiwemo wakimbizi wa Palestina.
Akirejea msimamo wake wa muda mrefu, ametoa wito wa mwisho wa kukomeshwa kwa “uvamizi usiohalali” wa maeneo ya Palestina na kufikiwa kwa maendeleo yasiyoweza kurejelewa kuelekea suluhisho la mataifa mawili, kulingana na sheria za kimataifa na maazimio husika ya Umoja wa Mataifa Israel na Palestina kuishi kwa amani na usalama ndani ya mipaka yao iliyo salama na inayotambulika, kulingana na mipaka ya kabla ya mwaka 1967, huku Jerusalem ikiwa mji mkuu wa mataifa yote mawili.
Anahitimisha ujumbe wake akisema, “na tufanye kazi pamoja kujenga mustakabali wa amani kwa wote.”
Historia ya Maadhimisho
Siku ya Kimataifa ya Mshikamano na Watu wa Palestina huadhimishwa na Umoja wa Mataifa kila mwaka tarehe 29 Novemba au karibu na tarehe hiyo (mwaka huu yameadhimishwa tarehe 25 Novemba), kwa mujibu wa maagizo ya Baraza Kuu yaliyomo katika maazimio 32/40 B ya tarehe 2 Desemba 1977, 34/65 D ya tarehe 12 Desemba 1979, pamoja na maazimio mengine yaliyopitishwa chini ya ajenda ya “Suala la Palestina.”
Tarehe 29 Novemba ilichaguliwa kutokana na umuhimu na maana yake kwa watu wa Palestina. Siku hiyo mwaka 1947, Baraza Kuu lilipitisha Azimio 181 (II), maarufu kama Azimio la Ugawaji (Partition Resolution). Azimio hilo lilitoa mpango wa kuanzishwa kwa “Dola ya Kiyahudi” na “Dola ya Kiarabu” nchini Palestina, huku Jerusalem ikiwa corpus separatum chini ya utawala maalum wa kimataifa. Kati ya mataifa mawili yaliyotakiwa kuanzishwa chini ya azimio hilo, ni moja tu Israel ndilo lililoundwa hadi sasa.