TIMU ya Taifa ya Wanawake Tanzania kwa Mchezo wa Futsal, imeondolewa kwenye michuano ya kuwania ubingwa wa Kombe la Dunia baada ya kupokea kichapo cha mabao 9-0 dhidi ya Japan.
Mechi hiyo ya mwisho ya kundi C, imepigwa mapema leo asubuhi Novemba 29, 2025 kwenye Uwanja wa PhilSports Arena, Pasig nchini Ufilipino yanapoendelea mashindano hayo.
Matokeo hayo yanaifanya Tanzania iliyomaliza nafasi ya tatu kwenye msimamo wa kundi hilo ikiwa na pointi tatu ikiungana na New Zealand iliyopoteza mechi zote kushindwa kufuzu robo fainali.
Kutoka Kundi C, Ureno iliyokuwa kileleni na pointi tisa na Japan iliyokusanya pointi sita, zimetinga robo fainali, hatua itakayoanza kuchezwa Desemba 1, mwaka huu uwanjani hapo.
Tanzania ilianza kuchanga karata zake vibaya baada ya mechi ya kwanza kupokea kichapo cha mabao 10-0 dhidi ya Ureno, ikashinda mabao 4-2 dhidi ya New Zealand na leo imeondolewa kwa kupokea kichapo cha mabao 9-0.
Wakati Tanzania iliyowakilisha ukanda wa Afrika ikiondolewa mapema, Morocco iliyopo kundi A imetinga robo fainali baada ya kumaliza nafasi ya pili ikikusanya pointi sita, mechi ya kwanza ilipoteza kwa mabao 6-0 dhidi ya Argentina, ikashinda mabao 3-2 dhidi ya wenyeji Ufilipino kisha ikamaliza kwa ushindi wa bao 1-0 dhidi ya Poland.
ILIVYOKUWA
Tanzania na Morocco ndio timu pekee kutoka Afrika kufuzu mashindano hayo, ikiwa mara ya kwanza kwa CAF kuyaanzisha lakini kwa duniani hii ni mara ya pili baada ya kufanyika 2010 nchini Hispania ambako Brazil ilitwaa ubingwa huo.
Tanzania ilifuzu kucheza mashindano hayo baada ya kufika fainali na kuondolewa na Morocco kwa kuchapwa jumla ya mabao 4-3, hivyo bingwa na mshindi wa pili wakafuzu moja kwa moja Kombe la Dunia.
Fainali za Mataifa ya Afrika za Futsal ambazo zimetumika kuzipata timu hizo mbili, zilifanyika nchini Morocco kuanzia Aprili 22 hadi 30 ambako wenyeji na Tanzania waliokutana katika mechi ya fainali, ndio walioiwakilisha Afrika katika Kombe la Dunia la Futsal la Fifa 2025.
Hii ni mara ya kwanza kwa mashindano ya Futsal kuandaliwa na Shirikisho la Soka Afrika (CAF) kwa upande wa wanawake na Tanzania iliandika rekodi ya kwanza kwenye mchezo huo.
Tanzania ilipangwa kundi C na Madagascar, Senegal huku kundi B likiwa na Angola, Misri na Guinea ilhali Kundi A likiwa na waandaaji wa mashindano hayo Morocco, Cameroon na Namibia.
Katika Bara la Ulaya, UEFA ilizindua mashindano ya kwanza ya Futsal kwa Wanawake (UEFA Women’s Futsal EURO) Februari 2019, yakihusisha timu kutoka mataifa manne, Hispania, Ureno, Urusi na Ukraine.