Arumeru. Waziri wa Ujenzi, Abdallah Ulega amewataka wananchi wa Wilaya ya Arumeru kutunza miundombinu ikiwemo taa za barabarani na kwamba ni aibu kuharibiwa kwa miundombinu hiyo inayomnufaisha kila mtumiaji wa barabara.
Aidha, amemwagiza Meneja wa Wakala wa Barabara Tanzania (Tanroads) Mkoa wa Arusha, Mhandisi Reginald Massawe, kufunga taa za barabarani katika eneo la Malula lenye urefu wa zaidi ya kilomita moja ambalo halina taa hizo, katika barabara kuu ya Arusha – Moshi.
Waziri Ulega ametoa maelekezo hayo leo Jumamosi Novemba 29, 2025 alipokuwa akikagua ujenzi wa makalavati makubwa matatu na uinuaji wa tuta eneo la King’ori, Wilaya ya Arumeru katika eneo hilo korofi ambalo hujaa maji katika barabara ya Moshi – Arusha.
Ulega ametoa maagizo hayo kufuatia ombi la mbunge wa Arumeru Mashariki, Joshua Nassari aliyeomba kipande hicho kuwekewa taa ili kuongeza usalama wa watu, mifugo pamoja na watalii ambao hutumia barabara hiyo kuelekea Uwanja wa Ndege wa Kimataifa wa Kilimanjaro (Kia).
Amesema vitendo vya uharibifu huo vinasikitisha na vinapaswa kulaaniwa kwani hizo ni mali za umma na hakuna sababu ya watu kuharibu mali za umma kwani gharama hizo za kurekebisha zingeweza kufanya mambo mengine ya maendeleo.
“Wananchi Arumeru na viongozi naomba mtunze miundombinu hii, hizi taa tunaziweka vizuri watu wengine wanafanya vurugu wanakuja kuziangusha, kuzichoma moto, tunarudi hatua nyuma. Haina maslahi yoyote kwa taifa letu na wala hailipi, hatuna tunayemkomoa bali tunajikomoa sisi wenyewe.
“Kwa kweli hiki kitu kisemwe hadharani ni aibu kubwa sana kuona mtu anaweza akafanya makusudi kuharibu miundombinu mizuri kama hii hapa ambayo inamfaa yeye mwenyewe na ndugu zake, unapoangusha hunikomoi mimi wala mbunge au Mkuu wa Wilaya,” amesema.
Kuhusu ombi la Nassari, amemwelekeza Mhandisi Masawe kusimamia hilo na kuwa hoja hiyo inajibika na amemwelekeza meneja wa Tanroads atafute haraka kadri awezavyo na kuweka taa hizo katika kipande kilichobaki.
“Mbunge ameomba tuongeze taa za barabarani katika hiki kipande kilichobakia, Meneja, natoa maelekezo na kwa sababu hoja inajibika na hoja inaelekezeka na itapendezesha mji wetu na barabara hii, ni muhimu sana, kwa hiyo tafuta kadri uwezavyo, haraka iwezekanavyo, unganisha hiki sehemu ilichobaki,” amesema.
Ameongeza kuwa: “Ikiwa utahitaji baraka zangu, basi wewe andika pale kwa maelekezo ya Waziri, kwamba hiyo sehemu iliyobaki ipate taa ikiwa ni 20, 30, 40, ziwekwe eneo lote zaidi ya kilomita moja.”
Awali, Nassari amemweleza Waziri huyo kuwa changamoto kubwa za jimbo hilo ni barabara na maji na kuwa ategemee usumbufu mkubwa kuhusu sekta hiyo muhimu katika kukuza uchumi.
“Ajenda ya kwanza ni barabara, hutanifurahia sana kwani usumbufu wangu kwako utakuwa mkubwa kuhusu barabara, tutaomba kuongezewa bajeti kwani hata barabara za Tarura lazima zijengewe mitaro,” amesema.
Nassari ametaja moja ya barabara hizo kuwa ni pamoja na yenye urefu wa kilomita 28 kutoka Tengeru-Mbuguni hadi Mirerani, kipande cha kati hakijajengwa na kuwa itakuwa njia mbadala ya kutumika na magari makubwa ya mizigo kwani kwa sasa yanasababisha foleni katika barabara kuu hiyo na wakati mwingine kuchelewesha watalii wanaoenda Kia.
Akitoa taarifa za mradi huo,Mhandisi Massawe amesema kuwa kufuatia tukio la Aprili 25, 2025 lililosababisha vifo vya watu wanne wa familia moja baada ya gari walilokuwa wakisafiria kusombwa na mafuriko katika eneo hilo, Serikali ilianza ujenzi wa madaraja mapya kama hatua ya kudumu kukabiliana na maafa na changamoto za miundombinu.
Amesema makalavati hayo matatu na uinuaji wa tuta la barabara katika eneo hilo yatakuwa suluhisho la kudumu na kuondoa kero ya maji kujaa hadi juu ya barabara hasa wakati wa mvua kubwa na kuwa katika mradi huo watu zaidi ya 200 wa maeneo husika.
Amesema mradi huo umefikia asilimia 95 ikiwemo ujenzi wa barabara ya mchepuo kilomita 1.5,makalvati makubwa matatu,uinuaji tuta la barabara,kujenga tabaka la chini,tabaka la juu na kuweka taa za barabarani 85 na unatarajiwa kukamilika Desemba 15, 2025.
“Eneo hili ni hatarishi miaka miwili nyuma watu walipata ajali na kusababisha vifo.Mradi umefika asilimia 95 na tumepokea maelekezo yako Waziri ya kuweka, taa katika eneo la Malula tutafanyia kazi,”amesema
Kuhusu barabara ya Tengeru-Mirerani, Mhandisi Massawe amesema usanifu wa barabara hiyo umeshafanyika na kuwa watamshauri Waziri kwa kuonyesha umuhimu wa barabara hiyo ambayo itasaidia kupunguza msongamano wa barabara.
Mkuu wa Mkoa wa Arusha, Amos Makalla ametaja miongoni mwa barabara ambazo ni kipaumbele kwa mkoa huo ni pamoja na barabara ya Mto wa Mbu-Engaruka yenye urefu wa kilomita 50 ambapo usanifu umeshakamilika inasubiriwa idhini ya Wizara hiyo ili mkandarasi aanze kazi pamoja na kilomita 10 za barabara ya Arusha – Kibaya (Kiteto).
“Vurugu za Oktoba 29, 2025, katika sekta yako ya Ujenzi, walivunja taa, tunaendelea kufanya tathmini, ya awali umeipata. Niwasihi wananchi hii miundombinu ni yenu, msirudie kuharibu,” amesema.