Umoja wa Afrika (AU) umetangaza kuizuia mara moja Guinea-Bissau kushiriki katika shughuli zake zote hadi utaratibu wa kikatiba utakaporejeshwa nchini.
Kwa mujibu wa taarifa iliyotolewa Jumamosi, uamuzi huo wa Baraza la Amani na Usalama la AU ulifikiwa siku mbili baada ya jeshi la nchi hiyo kutangaza kumng’oa madarakani Rais Umaro Sissoco Embalo.
Baraza hilo “limekemea vikali mapinduzi ya kijeshi ya Novemba 26 nchini Guinea-Bissau, likiyataja kama mabadiliko yasiyo halali ya utawala kinyume na kanuni za AU.”
Tangazo hilo lilitolewa baada ya kikao cha dharura cha Baraza hilo siku ya Ijumaa. Baraza pia limelitaka jeshi kuwaachia huru bila masharti maafisa wa uchaguzi na wanasiasa waliokamatwa.
Aidha, AU imezitaka jumuiya za kikanda na kimataifa, ikiwemo Jumuiya ya Uchumi ya Nchi za Afrika Magharibi (ECOWAS), Jumuiya ya Nchi Zenye Lugha ya Kireno (CPLP), Umoja wa Mataifa na washirika wengine, kusaidia kurejesha haraka utawala wa kikatiba katika taifa hilo dogo la Afrika Magharibi.
Kundi la maafisa wa kijeshi, likijitambulisha kama “Kamandi Kuu ya Kijeshi ya Urejeshaji wa Usalama wa Taifa na Utulivu wa Umma,” lilitangaza Jumatano kuwa limechukua madaraka yote ya dola na kumng’oa madarakani Embalo. Kamandi hiyo ilimteua Jenerali Horta Inta-A kuwa rais wa mpito Alhamisi kwa kipindi cha mwaka mmoja.
Mapinduzi hayo yalifanyika wakati mgombea huru Fernando Dias na kambi ya Embalo wakidai ushindi katika uchaguzi wa urais wa Novemba 23, huku taifa likisubiri matokeo rasmi yaliyotarajiwa kutolewa wiki hii.
Baraza la Amani na Usalama la AU limewataka wanajeshi kuruhusu kukamilika kwa mchakato wa uchaguzi na kuheshimu matakwa ya wananchi.
Wakati huohuo, ujumbe wa ngazi ya juu kutoka ECOWAS, ukiwa na marais wa Senegal, Cape Verde na Sierra Leone, unatarajiwa kuwasili katika mji mkuu wa Guinea-Bissau, Bissau, mwishoni mwa wiki hii.
Wakati huo huo, Embaló, amekimbilia nchi jirani ya Senegal baada ya jeshi kuchukua mamlaka.
Embaló aliwasili Dakar Alhamisi kwa ndege ya kukodiwa iliyopangwa na viongozi wa jumuiya ya kikanda ya Afrika Magharibi – ECOWAS – waliotilia mkazo kuachiliwa kwake kutoka kizuizini. Hayo ni kwa mujibu wa taarifa ya Wizara ya Mambo ya Nje ya Senegal.