Dar es Salaam. Mamlaka ya Maendeleo ya Biashara Tanzania (Tantrade) inaendelea kuwafanyia tathmini wawekezaji watano waliojitokeza kufanya uendelezaji wa Uwanja wa Maonyesho wa Mwalimu Julius Nyerere maarufu Sabasaba.
Wawekezaji kutoka mataifa ya China, India, Dubai na Holland wameonyesha nia ya kuwekeza katika miradi tofauti kati ya tisa iliyopangwa kutekelezwa ndani ya uwanja huo kupitia mfumo wa ubia kati ya Sekta ya Umma na Binafsi (PPP).
Mkurugenzi wa Tantrade, Latifa Khamis, amesema hayo jana Novemba 28, 2025 alipozungumzia hatua iliyofikiwa tangu wawekezaji walipoitwa kuchangamkia fursa hiyo Juni 16, 2025.
Uboreshaji unaotarajiwa kugharimu Sh948.5 bilioni unalenga kuufanya uwanja huo kuwa kitovu cha kisasa cha biashara, burudani na uwekezaji kitakachofanya kazi saa 24, ndani kukiwa na huduma zikiwamo kumbi za sherehe, hoteli, maduka na michezo ya watoto.
Khamis amesema hatua hiyo inakusudiwa kuongeza uchumi wa Taifa, huku akihamasisha mashirika, taasisi na wawekezaji binafsi kushiriki kuuboresha uwanja huo wa kihistoria unaokaribia miaka 50 tangu kuanzishwa kwake.
Amesema kati ya wawekezaji watano waliojitokeza, baadhi wana nia ya kuwekeza kwenye kumbi za mikutano na hoteli.
“Tunaangalia wale waliokuwa na utayari, mtu akija na hela nyingi pia lazima tuangalie uhalali wake. Wengine wakija wanataka tu mradi mmoja labda anataka kuwekeza kwenye kumbi za mikutano kutokana na uzoefu wake au hoteli kulingana na kile anachokifanya,” amesema.
Kupitia miradi tisa inayolenga kutekelezwa ndani ya uwanja huo, kila mwekezaji mwenye nia ya kusimama katika mradi mmojawapo atapewa baada ya kukidhi vigezo.
Uendelezaji wa uwanja huo ni utekelezaji wa agizo la Waziri wa Viwanda na Biashara, Judith Kapinga alilotoa alipozungumza na bodi na menejimenti ya Tantrade.
Juni, 2025 mradi huo ulipotangazwa, Mkurugenzi Mtendaji wa Kituo cha Ubia kati ya Sekta ya Umma na Sekta Binafsi (PPP), David Kafulila alisema Serikali pekee haiwezi kumudu kugharimia mradi huo mkubwa, hivyo ushiriki wa sekta binafsi ni jambo la lazima.
“Ni gharama kubwa na tunahitaji wadau wa sekta mbalimbali kuwekeza katika mradi huu wa kipekee,” alisema akiwataka wananchi kuondokana na dhana kuwa uwekezaji wa sekta binafsi katika sekta ya umma ni kuuza mali ya umma, badala yake wazoee kuona sekta za umma zikiendeshwa na sekta binafsi.
Khamis kwa upande wake alisema: “Uwanja wetu umepitwa na wakati, tunatambulisha mpango mkakati wa kuuendeleza ili kuvutia wawekezaji wenye nia ya dhati. Tunawaomba wawekezaji kujitokeza huku kwani mradi huu unakadiriwa kugharimu Dola milioni 322 za Marekani (Sh948.5 bilioni) na unatarajiwa kukamilika kabla ya mashindano ya AFCON.”
Mradi utahusisha ujenzi wa kumbi za kisasa, hoteli, maeneo ya burudani, makazi, mifumo ya ulinzi wa kidijitali, mawasiliano na taa za kisasa kama ilivyo katika mataifa yaliyoendelea.
Kupitia uboreshaji huo, wananchi watapata nafasi ya kuutumia uwanja kwa saa 24 kwa wiki nzima bila kungoja maonyesho ya Sabasaba.
Khamis amesema uchambuzi wa kina utafanyika ili kupata mwekezaji bora, wakiwamo watakaowasilisha mapato ya manufaa kwa TanTrade, muhtasari wa nia ya uwekezaji na uwezo wa kiusimamizi na kiteknolojia.
“Mradi huu tunatamani uanze hata kesho. Muda wowote mwekezaji atakapopatikana, utekelezaji utaanza mara moja,” amesema.
Akiwa ziarani ofisi za Tantrade, Waziri Kapinga aliipongeza mamlaka hiyo kupitia kazi yake ya kuwaunganisha wazalishaji wa Tanzania na masoko ya kikanda na ya kimataifa.
Amesema jitihada za TanTrade zimeongeza fursa kwa wafanyabiashara, zimechochea uongezaji thamani na zimeimarisha utofautishaji na utambulisho wa bidhaa za Tanzania nje ya nchi.
Alielekeza mamlaka hiyo kuboresha kusomana kwa mifumo yake ya kidijitali na kuongeza uwasilishaji wa taarifa za biashara na masoko kwa wadau.
“Upatikanaji wa taarifa sahihi za masoko na kwa wakati ni muhimu katika kusaidia uamuzi wa biashara na kuongeza ushindani wa nchi,” amesema.
Alisema upatikanaji wa taarifa utachochea ukuaji wa sekta ya biashara na kuwawezesha Watanzania wengi kunufaika na fursa zinazoendelea kuongezeka za masoko.
Pia alitaka Tantrade kufanya maboresho ili majukumu waliyokasimiwa wayafanye kwa mujibu wa sheria, huku akitaka sheria na kanuni zilizopitwa na wakati zifanyiwe kazi ili kuendelea kuboresha mazingira ya biashara nchini.