India. Watu wengi maarufu duniani wamekuwa na kawaida ya kurithisha kazi wanazofanya kwa watoto wao. Lakini watoto wengine huvutiwa na kazi za wazazi wao na kujikuta wakizifanya zaidi yao.
Katika ulimwengu wa soka, nyota wa Ureno na klabu ya Al Nassr ya Saudia, Cristiano Ronaldo kijana wake Christiano Jr amefuata nyayo za baba yake aliyewahi kutikisa dunia akiwa na klabu mbalimbali Ulaya ikiwamo Man United.
Ipo mifano mingi ya mastaa ambao watoto wao wamerithi vile wanavyofanya wazazi wao. Mfano nyota wa muziki wa Marekani, Beyonce. Binti yake wa kwanza Blue Ivy ambaye amezaa na mumewe rapa JayZ anapita mule mule akiwa dansa wa mama yake.
Sasa achana na hayo yote, staa wa filamu za Bollywood, Shah Rukh Khan (SRK) ni miongoni mwa wasanii ambao watoto wake wamemfuata nyayo.
Watoto hao ni Aryan Khan ambaye ni mwongozaji wa filamu na Suhana Khan ambaye ni muigizaji anayechipukia kwenye filamu za India.
SRK ni moja ya wasanii walioweka alama kwenye filamu za India na duniani kwa ujumla na kupata umaarufu mkubwa wa kuigiza filamu za mapenzi tangu mwisho mwa mwaka 1980.
Ameigiza filamu zaidi ya 100 kwenye chaneli mbalimbali ikiwamo Dilwale Dulhania Le Jayenge (1995), Kuch Kuch Hota Hai (1998) ambayo alipata umaarufu mkubwa zaidi,
Kabhi Khushi Kabhie Gham (2001), Mohabbatein (2000),Dil To Pagal Hai (1997), Kal Ho Naa Ho (2003), Veer-Zaara (2004), Jab Tak Hai Jaan (2012) na nyinginezo.
Hapa nimekuchambulia watoto wa nyota huyo aliyejipatia umaarufu ulimwenguni kwa kuigiza filamu za mapenzi, namna wanavyopita njia zile zile za baba yao.
Aryan Khan
Huyu ni kijana wa kwanza wa SRK alizaliwa Novemba 12, 1997 mjini Mumbai nchini India, mara kadhaa amekuwa akionekana kwenye shughuli mbalimbali za baba yake.
Tofauti na matarajio ya wengi, Aryan hakuwahi kuwa na hamu ya kuwa muigizaji kama baba yake. Hakutaka kuishi chini ya kivuli cha jina la SRK hivyo akaamua kuchukua njia yake ya kuwa muandishi wa hadithi, muongozaji na mzalishaji wa filamu.
Kwa kuwa alikuwa siriazi na kazi hiyo alienda kusomea katika University of Southern California (USC), moja ya vyuo bora zaidi duniani katika masuala ya filamu.
Hapo alijikita katika uhariri, uongozaji na uzalishaji
wa filamu na baada ya kumaliza masomo, Aryan alianza kufanya miradi ya ubunifu, ikiwamo kutengeneza filamu fupi pamoja na dada yake Suhana na baba yao kama majaribio.
Kazi yake ya kwanza inatarajiwa kuachiwa rasmi Desemba mwaka huu ikienda kwa jina la Bads Bollywood itakayoonekana Netflix ikiwa na episode saba.
Suhana Khan
Ni mtoto wa pili na binti pekee wa SRK na mkewe Gauri. Huyu ni kipenzi cha baba yake na mara kadhaa amekuwa akizungumzia bondi yake nyumbani na hata kwenye kazi.
Kuangalia kazi za baba yake kulimfanya moja kwa moja kuchagua kuwa muigizaji ingawa awali Khan hakuzingatiwa sana na wazazi wake.
Tofauti na kaka yake, Suhana Khan alionyesha wazi kuwa anataka kuwa muigizaji. Ndoto hiyo aliianza kabla hata ya kumaliza shule ya msingi.
Hivyo baada ya kumaliza elimu yake alijiunga na chuo cha sanaa, Tisch School of the Arts (NYU) kilichopo Marekani akichukua Degree alipojifunza kozi kadhaa za uigizaji.
Hadi sasa amecheza filamu tatu The Grey Part of Blue (2019) hii ilikuwa filamu fupi iliyompa nafasi ya kwanza kuonekana kwenye skrini.
Filamu nyingine The Archies (2023). Filamu ya muziki na vijana iliyoandaliwa kwa Netflix India, Suhana aliigiza kama Veronica Lodge, moja ya nafasi kuu katika filamu hiyo na hapa aliigiza kwa ukubwa zaidi.
Filamu nyingine ni King inayaotarajiwa kutoka mwakani na tayari trealer ya filamu hiyo imeachiwa ndani akiigiza na baba yake.
Licha ya kuanza kuigiza lakini wachambuzi wa filamu nchini India wanaona bado Suhana hafikii kiwango cha baba yake ambaye akiwa mbele ya Kamera anafanya zaidi ya uhalisia.
Msikie mwenyewe
Kwenye mahojiano mbalimbali SRK mwenyewe amekuwa akisisitiza mara kwa mara kuwa hakuwahi kuwalazimisha watoto wake kuingia kwenye tasnia ya filamu badala yake aliwahimiza wachague wanachokipenda na kukifanyia kazi kwa bidii.
“Sikuwahi kuwaambia waingie kwenye filamu wamechagua wenyewe labda kwa sababu wananiona nikifanya. Mimi kazi yangu ni kuwashika mkono tu na nimekuwa nikiwaambia wasiishi chini ya kivuli changu badala yake wapambane kwa sababu tasnia ngumu.”