Waziri wa Ulinzi wa Iran amesema Jamhuri ya Kiislamu ipo katika kiwango cha juu zaidi cha utayari wa kijeshi kuwahi kushuhudiwa, akisisitiza kuwa kila kitendo cha uhasama kitapokewa kwa majibu “makali na mazito kuliko wakati wowote uliopita.”
Brigedia Jenerali Aziz Nasirzadeh amesema kuwa Jeshi la Nchi hiyo linaendesha shughuli zake kwa kujiamini kimkakati, likiwa na ufuatiliaji wa moja kwa moja na uelewa wa hali ya vita ulio juu.
Ameongeza kuwa: “Vitisho vinachunguzwa kwa umakini na bila kupumzika na kipaumbele si upelelezi pekee, bali ni utayari wa kudumu wa vikosi vya ulinzi.”
Aidha amesema: “Leo, kwa nguvu kamili na ustadi wa ukusanyaji taarifa za adui ulio thabiti, Iran iko tayari kujibu kila tishio kwa nguvu, mara moja, na kwa ukali zaidi kuliko ilivyowahi kufanya.”
Brigedia Jenerali asirzadeh amekumbusha maonyesho ya nguvu wakati wa vita vya siku 12 vya kichokozi vya utawala wa Kizayuni pamoja na Marekani mwezi Juni, akibainisha kuwa operesheni hiyo ilionyesha tu “sehemu ndogo” ya uwezo halisi wa ulinzi wa taifa.
Majibu ya Iran katika vita hivyo yalianza kwa awamu ya ulinzi, ikiwemo kuangusha mamia ya ndege zisizo na rubani za utawala wa Kizayuni wa Israel zenye thamani ya mamia ya mamilioni ya dola, pamoja na kuwatia mbaroni vibaraka walioshirikiana na maadui.
Awamu ya pili ilishuhudia Jeshi la Walinzi wa Mapinduzi ya Kiislamu (IRGC) likilipiza kisasi kwa kurusha mamia ya makombora ya balistiki, yakiwemo ya kasi ya juu (hypersonic), kuelekea malengo ya nyuklia, kijeshi na viwanda katika ardhi za Palestina zilizokaliwa kwa mabavu zilizopachikwa jina bandia la ‘Isarel.’
Shambulio hilo lilikuwa sehemu ya Operesheni Ahadi ya Kweli III, mwendelezo wa mashambulizi mawili ya awali yaliyofanikiwa dhidi ya Israel.
Jenerali Nasirzadeh ameonya kuwa: “Iwapo mahasimu watajikuta wakikosea mahesabu na kujaribu hata kitendo kidogo cha uhasama dhidi ya Iran, watakumbana na majibu ya papo hapo na watajutia.”