MABOSI wa Brighton & Hove Albion wanaangalia uwezekano wa kumtoa kwa mkopo mshambuliaji wa Kitanzania, Aisha Masaka kwenda Hispania baada ya kutopata nafasi ya kucheza kikosini hapo.
Mwanaspoti inafahamu mshambuliaji huyo wa timu ya taifa, Twiga Stars amebakiza mkataba wa mwaka mmoja England kati ya miwili na utamalizika mwishoni mwa msimu huu.
Kiongozi mmoja anayemsimamia Masaka aliliambia Mwanaspoti nyota huyo ameshindwa kuendana na kasi ya ligi hiyo hivyo wanataka kutoa kwa mkopo ili amalizie mkataba wake uliobakia.
Aliongeza sehemu nzuri ya kumpeleka na anaweza kupata nafasi ni Ligi ya Hispania anapocheza mtanzania mwenzie, Opah Clement anayekipiga SD Eibar ingawa ofa za awali zilikuja lakini walishindwana kwenye maokoto.
“Kuna timu ya Hispania awali ilikuja na ofa lakini haikuweza kuelewana waliweka ofa ndogo, kwa hiyo ikabidi wasubiri kwa kuwa kwa wakati ule alikuwa kwenye majeraha hivyo wakasubiri hadi apone,” amesema kiongozi huyo na kuongeza;
“Tangu amerejea kutoka kwenye majeraha, mazoezini anaonyesha lakini bado kuna vitu kocha anavikosa kwahiyo namna nzuri wanaangalia wamtoe ili acheze kama ataonyesha kiwango basi anaweza kurejeshwa au kama kuuzwa.”
Masaka alikuwa nje ya uwanja kwa takribani miezi miwili akiuguza jeraha la bega alilopata Novemba 09 mwaka jana kwenye mchezo wa Ligi ya Wanawake England dhidi ya Arsenal.
Tangu ajiunge na timu hiyo msimu jana akitokea BK Hacken ya Sweden nyota huyo alicheza mechi mbili kwa dakika 14 dhidi ya Arsenal (4) na Birmigham (10).