Siha. Mkuu wa Wilaya ya Siha mkoani Kilimanjaro, Christopher Timbuka, amewataka watumishi wa Halmashauri ya Siha kumpa ushirikiano Mkurugenzi Mtendaji mpya wa halmashauri hiyo, Hellen Mwembeta, ili aweze kutekeleza majukumu yake kwa ufanisi na kuwaletea wananchi maendeleo.
Timbuka alitoa kauli hiyo Novemba 29, 2025 katika ukumbi wa RC Sanya Juu, wakati wa hafla ya kumuaga aliyekuwa Mkurugenzi Mtendaji wa halmashauri hiyo, Haji Mnasi, na kumkaribisha mpya.
Akizungumza katika hafla hiyo, Timbuka aliwahimiza watumishi kuendeleza misingi ya ushirikiano waliyokuwa wakiionesha kwa uongozi uliopita, akisisitiza kuwa hakuna maendeleo yanayoweza kupatikana bila nguvu ya pamoja.
“Jitihada za ushirikiano huleta matokeo makubwa na ya haraka. Maendeleo hayawezi kuletwa na mtu mmoja. Ndiyo maana ushirikiano unahitajika kwa nguvu,” alisema.
Alisema maendeleo yoyote duniani yamekuwa yakichochewa na kazi za pamoja, hivyo ushirikiano wa watumishi ni msingi muhimu wa mafanikio ya Halmashauri ya Siha na Taifa kwa ujumla.
DC Timbuka pia alimsifu Mwembeta akisema katika kipindi cha miezi minne alichokaa Siha kabla ya uteuzi wake, tayari ameonesha kasi na uadilifu unaoendana na matarajio ya Serikali.
“Namkaribisha rasmi Mwembeta. Tumeona kazi yake katika miezi minne. Tunamtakia kila la heri atekeleze majukumu bila mashaka yoyote,” alisema.
Ameongeza kuwa utekelezaji wa majukumu ya halmashauri unategemea ushirikiano wa watumishi wote, na kwamba ofisi yake itaendelea kutoa ushirikiano wa kutosha katika nyanja zote ili kufanikisha malengo ya Serikali na wananchi.
Akizungumza kuhusu Mnasi, Timbuka alisema kuwa ameacha alama kubwa katika utendaji ambazo zinaonekana na zimeleta matokeo chanya kwa wananchi.
“Amefanya kazi. Alama zimeonekana na matunda yako wazi. Tunamtakia mafanikio kwenye majukumu anayokwenda kuyatekeleza,” alisema.
Kwa upande wake Mwembeta, alimshukuru Rais Samia Suluhu Hassan kwa kumuamini na kumpa nafasi ya kuongoza halmashauri hiyo. Aliahidi kufanya kazi kwa bidii, weledi na uwazi ili kufikisha maendeleo kwa wananchi wa Siha.
“Ninaahidi kufanya kazi kwa juhudi zote kwa ajili ya maendeleo ya wananchi wa Siha. Naomba ushirikiano wenu ili tufikie malengo ya pamoja,” alisema.