Arumeru. Waziri Mkuu, Dk Mwigulu Nchemba amewataka Watanzania kulinda amani na kuwakataa watu wachache wanaochochea, kuwachonganisha, kuvuruga amani, na kuharibu miundombinu inayogharimu fedha za umma, ikiwemo ile iliyojengwa kwa nguvu za wananchi.
Amesema vijana na Watanzania kwa ujumla wanapaswa kutambua kuwa wakichagua kuifukuza amani, wamechagua kuongeza umaskini.
Dk Nchemba amesema hayo alipozungumza na wananchi katika Kata ya Kikatiti, alipotembelea Kituo cha Polisi Kikatiti, ambacho ni miongoni mwa maeneo yaliyoathirika na vurugu zilizotokea Oktoba 29, 2025, na kusababisha uharibifu wa vituo vya polisi na vituo vya mafuta.
Amesema kama nchi haina amani hakuna kinachofanyika na kuwa wakichagua kufukuza amani wajue wamechagua kufukuza maendeleo
“Bado tuna kazi ya kupambana na umaskini wetu. Wakati nchi inapata uhuru, idadi ya watu waliokuwepo kipindi hicho, zaidi ya asilimia 80 sasa hivi watu ambao wako kwenye umaskini wa kupindukia ni asilimia nane, na waliopo kwenye umaskini wa kipato ni asilimia 26.
“Tukiamua kuchagua vurugu siku si nyingi maana kubomoa ni kitu rahisi sana tutakuwa na nusu ya nchi tupo kwenye umaskini wa kutupwa,” ameongeza.
Amesema ili maendeleo yatekelezwe, ni lazima Watanzania wachague kulinda amani ya nchi, kwani hilo ni jambo la msingi. “Msisitizo wote huu tunaongelea ni kuokoa maisha ya watu. Mimi niwaambieni vijana wa Kitanzania, wananchi wa Tanzania, mfano haka kalikotokea juzi, kila Mtanzania akatae. Tumechonganishwa, tumechochewa, tumeuana, halafu waliotuchochea wako pembeni. Hakuna jamaa hata rafiki aliyeguswa,” amesema.
“Sisi tunaposema tunatoa rai, tunasema tunaomba Watanzania wote tukatae jambo la aina hii lililotokea. Tunamaanisha tunathamini uhai wa kila Mtanzania. Anayekwambia nendeni mkiwashe, mchome nchi, mfanye vurugu, hawatakii uhai wa Watanzania,” amesema.
Dk Nchemba ameongeza kuwa wanafanyia biashara maisha ya Watanzania, wanalipwa kwa watu kufa, halafu wanataka kuwageuzia wananchi kuchukiana. “Wanaharakati wote wanaoishi kwa Watanzania kuuana, wanaishi kwa kuchochea vurugu. Mimi nimekuja kuwaambieni, kindugu, na mimi ni ndugu yenu. Waulizeni wanaharakati hao, wanafanya shughuli gani kujiingizia kipato zaidi ya wakichochea? Wajitokeze,” amesema.
Dk. Nchemba amedai kuwa hivi karibuni, wakati wa vurugu, baadhi ya wanaharakati walikuwa wakitumiana ujumbe mfupi wa maandishi. Kijana mmoja, aliyekuwa anaomba songesha, alipewa Dola milioni mbili, ambazo ni takriban Sh. 5 bilioni.
“Kijana mwenzetu wa mtaani kaondoka na akaenda kuishi Afrika Kusini au Nairobi kwenye hoteli ya kitalii, kapewa fedha hizo kwa ajili ya demokrasia. Na wale wengine wote wanaochochea, tunawaambia Watanzania kataeni vurugu kwa sababu duniani kote vurugu hazijawahi kutokea zisiwe na madhara,” amesema.
Amesema yule anayewapa fedha anataka baadaye Watanzania wakishapigana watachukua madini, ikiwemo urani na gesi, na wanajua hawawezi kuyapata kama Watanzania wako pamoja.
Amewataka wananchi kuambizana kindugu na kukataa jambo linalowagawa, linalowaachia makovu na kusababisha wachukiane na wasisameheane kwani hilo halina mshindi.
“Vijana wenzangu nawaambieni, Tanzania hii si mali ya Serikali; vyama vya siasa ni mali yenu, Watanzania,” alisema Dk Nchemba.
Dk Nchemba alitolea mfano Kituo cha Polisi Kikatiti kilichojengwa na wananchi kwa fedha zao binafsi, akiwataka watambue wamejinyima kwa kiasi kikubwa aina ya maisha ili kutekeleza miradi mbalimbali ya maendeleo, hivyo wanapoharibu wanakosea.
“Inaudhi, inauma, na mimi naomba Watanzania amkeni. Tunaweza kuwa na tofauti zetu, ila thamani yake hayawezi kulingana na damu ya mtu mmoja na thamani ya Tanzania,” amesema.
Awali, Mkuu wa Mkoa wa Arusha, Amos Makalla, ameeleza kuwa katika mkoa wa Arusha, wilaya za Arumeru na Arusha ziliathirika na vurugu za Oktoba 29, 2025.
Katika ziara ya Dk. Mwigulu, alitembelea Kituo cha Polisi, kituo cha mafuta, pamoja na Mahakama ya Mwanzo Maji ya Chai. Kituo cha Polisi kilijengwa kwa nguvu za wananchi na kufunguliwa mwenge wa 2003, lakini sasa wananchi hao hawana huduma hiyo muhimu karibu.
“Kamati za ulinzi na usalama zilijipanga kuhakikisha sekta ya utalii iko salama, hakuna mtalii anaibiwa au kujeruhiwa, na ndiyo maana watalii wanaendelea kuja Arusha,” amesema Makalla.