Dar es Salaam. Uongozi wa Kanisa la Ufufuo na Uzima la Askofu Josephat Gwajima umedai kuwepo kwa upotevu na uharibifu wa mali zenye thamani ya Sh2.7 bilioni katika kipindi ambacho kanisa lao lilikuwa chini ya ulinzi wa Jeshi la Polisi.
Waumini wa Kanisa hilo leo Novemba 30, 2025 wamefanya ibada ya kwanza ya Jumapili, ikiwa imepita zaidi ya miezi sita tangu kufutiwa usajili.
Kanisa hilo lilifutiwa usajili wa kuendelea na huduma Juni 2, 2025 kwa kile kilichoelezwa na Msajili wa Jumuiya za Kiraia, Emmanuel Kihampa kuwa limekiuka Sheria za usajili Sura ya 337, kwa kutoa mahubiri yenye mwelekeo wa kisiasa.
Tangu usiku wa siku hiyo hadi Novemba 25, 2025 saa 7:30 mchana, kanisa hilo lilikuwa chini ya ulinzi wa Jeshi la Polisi, kabla ya Mkuu wa wilaya ya Ubungo, Albert Msando kwenda kuruhusu huduma kuendelea baada ya Novemba 24, 2025 Waziri Mkuu, Dk Mwigulu Nchemba kutangaza lifunguliwe.
Leo ni Jumapili ya kwanza tangu lifunguliwe ambapo mamia ya waumini wamejitokeza katika ibada iliyoanza saa 3:00 asubuhi huku wengine wakipeperusha bendera 15 zenye nembo, rangi na maandishi tofauti ikiwamo bendera ya Tanzania wakizunguka kwa ishara kama wanafanya paredi wakifuatisha mapigo ya nyimbo za kusifu na kuabudu zinazochezwa kanisani hapo.
Baada ya tukio hilo, Askofu Baraka Tegge ambaye ni mchungaji kiongozi na mkuu wa utawala na fedha wa makanisa amewaeleza waumini uharibifu wa mali za kanisa uliofanyika katika kipindi ambacho lilikuwa chini ya ulinzi wa polisi.
Amedai mali zenye thamani ya zaidi ya Sh2.7 bilioni zimeibwa na kuharibiwa ikiwemo fedha taslimu Sh420 milioni zilizokuwa zimewekwa kwenye ‘shelf’ maalumu.
Vingine alivyovitaja ni vifaa vya kanisa pamoja sare za wanakwaya akibainisha pia kwenye ofisi ya utawala kompyuta mpakato yenye nyaraka za ofisi na taarifa nyingine pamoja na runinga vimeibwa.
Vingine alivyovitaja ni nakala za vyeti vya ndoa, vyeti vya ubatizo huku ofisi ya Askofu Mkuu (Josephat Gwajima) ikivunjwa na mali zilizoibwa katika ofisi hiyo ni kompyuta, printer, televisheni na ipad.
Amedai kwenye ofisi ya machapisho mali zilizoibwa ni kompyuta, nyaraka, hard disk na printer wakati kwenye stoo ya kanisa zilizoibwa ni sare za wanakwaya, vyombo vya kupikia, masufuria, sahani na vikombe.
Amedai kwenye ukumbi wa kanisa mali zimeibiwa vikiwamo viti 1,826.
Wakati kwenye stoo ya kutunzia vifaa vya muziki, vyote vimechukuliwa ikiwamo mixer, extension cable na speker kubwa.
“Kwenye chumba cha printing, mali zilizoibiwa ni kompyuta mpakato, kompyuta aina ya iMac na vifaa vya printing. Milango ya kanisa nayo imeharibiwa, thamani ya mali zote ni Sh2.76,” amesema.
Ibada inaendelea kanisani hapo ikiongozwa na maaskofu na mitume wa kanisa hilo.