Wakati ikisomwa ripoti ya mapato na matumizi ya mwaka uliopita kwenye mkutano mkuu wa Simba, umeibuka mzozo baada ya hoja kumbana Mwenyekiti wa Simba Murtaza Mangungu.
Baada ya kusomwa ripoti ya mwaka jana ya mapato na matumizi mwanachama Hussein Simba, akauliza juu ya uhalali wa ripoti hiyo hali ya kuwa haijapitishwa na mkaguzi wa nje wa masuala ya fedha.
Aidha Simba akaongeza kuwa tayari ameshaushitaki uongozi wa Simba kuanzia Mwenyekiti wake Mangungu kwa Baraza la Michezo nchini (BMT) juu ya uvunjifu wa kanuni kwa klabu kutokuwa na mkaguzi huku akihoji kama uongozi huo unatosha kuongoza klabu hiyo.
Baada ya Simba kuibua hoja hiyo, huku akishangiliwa na wanachama wenzake, Mangungu alijibu hoja hiyo akisema:”Nakushukuru ndugu yangu kwa hoja yako lakini naona wewe una tatizo lako binafsi na Mangungu lakini kama ni hivyo basi tutakutana tuangalie hilo,”alisema Mangungu.
Mara baada ya Mangungu kujibu hoja hiyo, wanachama walianza kumpinga na kuibua mzozo ndani ya ukumbi huo wakionyesha kupinga majibu hayo ya mwenyekiti wao.
Hata hivyo Afisa Mtendaji Mkuu Zubeda Sakuru, aliutuliza ukumbi huo alifafanua kuwa mkaguzi wa awali aliandika barua ya kuachia nafasi hiyo na sasa wapo kwenye mchakato wa kutafuta mwingine.
“Baada ya mkaguzi wa awali kujiuzulu, tupo kwenye mchakato wa kumtafuta mwingine kwa mujibu wa taratibu, mpaka Sasa tumewapata watatu na tukimaliza tutawaletea kwenye mkutano ujao,”alisema Sakuru na kuwapunguza makali wanachama wa klabu hiyo