Hali imeendelea kuwa tete kwa Mbeya City baada ya kupoteza mechi ya tatu mfululizo katika Ligi Kuu kwa kufungwa bao 1-0 na Namungo, huku mashabiki wakionekana kumkatia tamaa kocha mkuu wa timu hiyo, Malale Hamsini wakimtaka aondoke.
City iliyowahi kushuka daraja na kukosa Ligi Kuu misimu miwili, imerejea msimu huu, ambapo ilikuwa na mwanzo mzuri ikiwamo matokeo ya suluhu na Yanga na sasa hali imeonekana kubadilika.
Katika mechi tatu mfululizo, imepoteza miwili ugenini kwa bao 1-0 dhidi ya Mashujaa kisha kulala 2-0 mbele ya Coastal Union na leo ikiwa Uwanja wa Sokoine imelimwa tena 1-0 na Namungo na kujikuta ikiingia lawama na mashabiki wake.
Baada ya mechi hiyo mashabiki wa Mbeya City walijikusanya nje ya uzio na kuanza kumuimba Kocha Malale aondoke hawamtaki wakidai kutoridhishwa na mwenendo wa matokeo kwa timu hiyo.
Katika mechi hiyo iliyopigwa saa 8 mchana, Namungo ilicheza vizuri ukilinganisha na wenyeji na kufanikiwa kuondoka na pointi tatu zilizoipaisha nafasi ya nne kwa pointi 12 baada ya mechi nane, huku City ikishuka nafasi ya 10 kwa pointi nane kupitia mechi tisa.
Mchezaji Fabrice Ngoy ndiye alikuwa na mchezo bora kwa bao lake kuamua dakika 90 na kuihakikishia Namungo ushindi huo wa ugenini na kutangazwa mchezaji bora wa mechi hiyo.
Namungo chini ya Kocha, Juma Mgunda inafikisha mechi tatu mfululizo bila kupoteza ikiwa ni ushindi mbili dhidi ya Dodoma Jiji 2-0 na 1-0 mbele ya Mbeya Citya na sare ya 1-1 mbele ya Azam FC.